_شوف انت بقا يا حج انا ماعرفش،، مراتك ام محمد ماكانتش موافقة وابنك محمد انا عارفه بالعمايل اللي عملها عشان الجوازة ماتتمش حتى امك الحجة زكرية نفسها كانت رافضة الجوازة،، كلهم كانوا مستكترين عليك تتمتع بصحتك وفلوسك وخايفين انك تجيب من بنتي عيل ولا اتنين ويشارك عيالك الكبيرة مع إن ماحدش عارف مين هيورث مين
ساعتها انفعلت عليها
=انتي بتقولي ايه يا ام رباب،، ماسمحلكيش تقولي كدة وماحدش من اهل بيتي ليه في سحر ولا في اعمال ولا في اي كلام من دا خالص
فساعتها غيرت نبرة صوتها واتكلمت بهدوء وانكسار
_انا بتكلم من قهرتي على بنتي المرمية جوة دي يا حج وبعدين انت ماتعرفش النفوس ايه اللي جواها وممكن الغيظ يوصلها لأيه،، ولّا مين ممكن يكون ملى دماغ مين بالكلام،، وماتزعلش مني انا دلوقتي لو واثقة ان عمل بنتي هيتحل اذا انت طلقتها كنت هقولك ارمي عليها اليمين،، وشيل دا من دا يرتاح دا عن دا ،، البت ممكن تموت،، انما انت لازم تشوفلنا حل وبعد كدة كل شيء يكون بأوانه….
يدوب ماخلصتش جملتها ولقينا رباب بتصرخ على آخرها فجرينا عل الأوضة
كان جسمها بينتفض في السرير ووشها مخطوف لدرجة إني كنت خايف انها تفطس قبل ما يطلع عليها نهار فأمها جريت قعدت جنبها لغاية ما راحت في النوم تاني وانا فضلت زي ما انا على باب الأوضة
ولما طلعنا بعدها للصالة قلت لأمها تقعد معانا الكام يوم دول لغاية ما نشوفلها حل وعرّفتها إني من بكرة الصبح هبدأ اتطقس ورا الموضوع واللي هيطلع عمل العملة دي مش هرحمه،،
فردت_بس خلي بالك يا حج مش هينفع حتى تقرب عليها ولا تحاول تدخل الا لما نشوف حل
=ماتقلقيش يا ستي انا مش هيجيلي قلب اقرب عليها اصلا بظروفها دي..
وروحت مددت جسمي في أوضة تانية لاني كنت محروج أسيب الشقة واروح عند مراتي الأولانية في نص الليل،، خاصة إن شقتي دي في عمارة انا لسه شاريها جديد ومراتي الأولانيه في عمارتي القديمة وبينهم وبين بعض مسافه كبيره وخايف حد يشوفني نازل في ليلة دخلتي والكلام ساعتها يكتر.. أما أم رباب فراحت نامت جنب بنتها…
لكن فضلت انا طول الليل شبه صاحي وعمال أفكر في اللي حصل ومن شدة إنـ,ـكـ,ـاري للبس والحاجات دي كنت أقول يمكن حالة نفسية لكن أرجع افتكر الملمس اللي لمسته في الضلمة وصوتها الغليظ وهي مبرقة والهبد اللي كان بيحصل في الشقة كلها فأقول لا دا مش حالة نفسـ,ـية أبدا
وشوية أرجع أقول يمكن الدار نفسها مسكونة لكن إشمعنا ماحدش اشتكى من حاجه خالص بخصوص الشقة دي غير لما جيت ادخل على رباب،، ماهم بقالهم شهور بيشطبوا وبيجهزوا فيها ..
فكان تفكيري كله متوجه ناحية كلام أم رباب وإن حد عمل لبنتها عمل لكن كانت دماغي متلغبطة ومش عارف افكر في مين ولا مين ومش عايز اخد رباب واسلك سكك السحرة والعرافين،، انا راجل كبير وليه هيبته وعمري ما سلكت السكك دي
وفي نفس الوقت عايز أوصل للي عمل العملة دي عشان يبقى عقابه عسير وعسير قوي كمان،، بس اعرف هو مين…
هل ممكن فعلا تكون أم محمد ولا ممكن يكون محمد ولا يكونوا الاتنين متفقين…
طب مش يمكن تكون واحده من البنات،، ماهي كل واحدة متجوزة في بيت جوزها وماحدش عارف عنها حاجة وكلهم اكيد كانوا حزنانين على حزن امهم..
فضلت دماغي تودي وتجيب لغاية ما بدأت عيني تغفل لكن الغريب إن عيني مجرد ما غفلت شوفت الشيطان اللي وصفته رباب واقف عند طرف سريري بجسمه الضخم اللي مغطيه الشعر الأبيض وقرونه الحمره وعينيه اللي كلها سواد
فقومت منفوض في مكاني وانا بستغفر وفضلت قاعد شوية لغاية ما بدأ جسمي يخدل فمددت تاني
لكن مجرد ما عيني غفلت شوفته تاني وانتفضت تاني لدرجة إني مابقيتش عارف انا صاحي ولا نايم واللي بشوفه دا حقيقة ولّا خيال
بقيت كل ما عيني تغفل شويه أشوفه فانتفض وأقعد استغفر وارجع امدد ع السرير تاني وانا سايب نوري منور لغاية ما طلع النهار فقومت وانا مش مصدق إن الليلة دي عدت على خير….
لكن كانت صدمتي الشديدة لما شوفت حاجه زي زبد أخضر ع الأرض في نفس المكان اللي كان بيظهرلي فيه الشيطان..
فجريت غيرت هدومي وطلعت على شقة أم محمد
فأول ما قعدت كدة في أوضة الجلوس قصادها لقيتها بصتلي بصة غريبه على غير عوايدها المستكينة معايا وقالت
_صباحية مباركة
مش عارف ليها حسيت في بصتها إنها عارفه إني مادخلتش على رباب فقلت في بالي آخ يا ام محمد لو كنتي انتي اللي عملتي كدة بعد عشرة سبعة وعشرين سنة والله في سماه لاكون ناسي العشرة دي كلها في غمضة عين وما اربط اسمك باسمي تاني
لكن رديت ببرود
=غريبه يعني انك بتباركيلي،، مش كنتي رافضة لغاية ما كنت رايح اكتب الكتاب
_بس كتبت خلاص يبقى لزوم أباركلك بردو،،
=امممم،، عامة الله يبارك فيكي يا ام محمد،، امال محمد ابنك فين
فردت بتقل_راح الوكالة من الفجرية،، ما احنا عـ,ـارفين إنك مش هتروح زي عـ,ـوايدك
=طب وامي فين؟؟
_امك ماطلعتش من اوضتها من الصبح
=خلاص انا هروح أطل عليها ..
وساعتها روحت لأمي اللي قابلتني بوش مكشر،، ما هي كمان كانت رافضة الجوازة فبوست على ايدها وقعدت جنبها ع الكنبة ومن غير مقدمات حكيتلها اللي حصل ليلة امبارح وقلت لها ان حماتي بتقول ان معمول ل رباب عمل لكن من غير ما اقولها انها قالتلي انها شاكة في حد لكن الغريب إن لقيت أمي بتقول
_بخت ماتعرفش تدخل بيها ابدا وتطلقها ويا دار مادخلك شر،، وسيبلها الدهب اللي خسارة في جتتها وأديها قرشين كمان يمكن تكسر سمها،، ابعد عنها يا بني احسن يصيبك حاجه من أذاها
=ليه بتقولي كده يا أما هو الشرع مش حلل اربعه
_اربع عقارب يتلفحوا حوالين رقبتها،، دي زي التعبان فضلت تلف وتدور حواليك هي وأمها لغاية ما وقعوك
=خلاص يا أما انا هقوم اشوف مصالحي..
وقومت كدة لكن قبل ما اخرج من الأوضة لفيت ورجعت ناحيتها
=ألا ماتعرفيش يا أما مين اللي ممكن يكون عمل لها العمل دا؟؟
_قصدك إيه يا واد انت بالسؤال دا؟!
=ماقصديش يا أما
_والله لولا انه حرام ل كنت عاملاه انا،، وبقولهالك في وشك
ف ساعتها سيبت امي وطلعت،،. ما انا عارف ان امي عمرها ما تعمل حاجه زي كدة،، حتى ام محمد ست بتاعت ربنا لكن ممكن الغيظ صحيح يكون خلّاها تفكر في حاجه زي كدة،، خصوصا إن حبايبها ياما وبتاعت واجب ومابتسيبش ميتم ولا فرح الا وبتوجب فيه،، يا ترى حد لعب في دماغها وعمل العمل دا خدمة ليها…
المهم اني وقتها اخدت بعضي وروحت الوكالة فلقيت محمد خلّص الزرع اللي جالنا الصبحية وقاعد بيخلص حسابات
