كان قافل وشه هو كمان لما دخلت عليه لكن مايقدرش ينطق طبعا ولا يتكلم معايا في حاجه وفعلا ماجابش سيرة الجوازة لا بطيب ولا برضي وفضلنا في الوكالة طول النهار نظبط في الشغل لغاية المغربية وبعدها طلع ورايا بعربيته وروحنا اتعشينا،، وبعد العشا لقيته خد عربيته وخرج..
وانا عادتي لما بيخرج مابقولوش رايح فين ولا جاي منين ولا هتيجي امتى ولا حتى برن عليه،، وكنت بقول أهو بيخرج يقعد مع اصحابه ما هو لسه عازب مش مربوط بزوجة وعيال،، رغم اني كنت متدايق انه داخل على ال ٢٥ ولسه بيتهرب من الجواز..
لكن في الليلة دي كنت موصي عيل من صبيان الوكالة يقطره ويشوف هو بيروح فين….
ووصيت نفس الواد يحاول يلقط تليفونه في أي وقت لما نكون مشغولين في الشغل في الوكالة ويحاول يفتحه ويجيبلي قراره..
وفي نفس الوقت كنت طالب منه يطقس عن كل حياته وحواراته ويجيبلي تقرير مفصل عنه..
ويومها بردو كنت موصي واحدة من النسوان اللي بتخد مني شغل من سنين السنين وبتفرش بيه في السويقة إنها تروح لجوز النسوان والراجل الدجال بتوع السحر والأعمال في البلد وتراضيهم وتعرفلي منهم ان كان حد عمل سحر لرباب ولو كان في،، فهو مين ومن طرف مين…
وفضلت انتظر الاخبار لمدة تلات ليالي وكنت محافظ اني اكتم خبر سحر رباب وببيت عندها ليلة في أوضة لوحدي وعند أم محمد ليلة..
لغاية ما وصلتلي الأخبار اللي لغبطتلي كل حساباتي،، الأخبار اللي ممكن أطير فيها رقاب مش أطلق ولا اتبرى..
كانت أخبار عن محمد ابني لكن الغريب إن مش الواد اللي وصيته يقطره هو اللي جابها،، الواد دا كان لسه غطسان ورا محمد وبيطقّس وراه،، واللي جاب الأخبار كانت ام عماد اللي وصيتها تسأل لي الجماعه الدجالين اللي في البلد،، لكن الأغرب إنها جابت الأخبار من قبل ما تسأل الدجالين حتى..
انا لما وصيّتها تسأل إن كان حد عمل لرباب سحر ولا لا،، بدأت الأول تطقس في السويقة عن أخبار رباب وأمها،، ما هي أم رباب كان ليها فرش خضار هي كمان،، ورباب بنتها احيان كتير كانت بتقعد معاها وكانوا بييجوا يتسوقوا من عندي من الوكالة لغاية ما خليتهم يبطلوا يفرشوا لما خطبت رباب…
فلما قعدت ام عماد اللئيمة تسأل في دهاليز الدهاليز وتقرر واحده والتانية عرفت طراطيش كلام ان كان في حاجه بين رباب مراتي ومحمد ابني..
الحاجة دي بقا تفاصيلها ايه ماعرفتش بالتحديد لكن الكلام اللي وصلها إن محمد راح لأمه يطلب منها تتوسطله عندي عشان يخطب رباب لكنها رفضت وهزقته وقالتله على آخر الزمن مش لاقي الا دي تتجوزها،، وواحده تانيه قالت لها إن محمد كان بيتسلى برباب ولما حب يخلع منها راح قالها الحجة بتاعت رفض أمه دي،، ورباب ماكانتش أول ولا آخر واحده يلعب بيها محمد…
فلما جابت لي الأخبار دي،، دماغي كانت هتنفجر من التفكير،، يا تري كان بينه وبينها ايه،، معقول يكون غلط معاها؟؟!!
ويكون اللي شوفته في ليلة الدخلة دا حوار ومعمول عليا من رباب وامها عشان لما الاقي رباب مش بنت بنوت يقولولي دا العمل السفلي هو الللي فض الختم وتكون الحقيقة إنه ابني هو اللي فضه…
طب لو كان كدة وفعلا محمد كان عايز يتجوزها وطلب من امه تكلمني،، فليه أمه مابلغتنيش بالحكاية دي لما عرّفتها اني هتجوز رباب؟!
يمكن عشان عرّفتها بخبر جوازي قبلها بيومين اتنين،، بس بردو كانت قالت لي..
طب ولو ماكنش كلم أمه وكان عامل دا حوار عشان يهرب من رباب،، ليه ماجابهاليش على بلاطة وقال لي ان كان بينه وبينها حاجه،،
هو صحيح كان رافض أشد الرفض لما عرف بجوازي منها لكن ماقالش حاجه عن علاقتهم دي..
يمكن كان خايف اعرف بلاويه،، ولّا كان خايف أقول دا حوار بيعمله عشان يفركش الجوازه،، ولا كان خايف من ايه..
طب ولو كان موضوع العمل دا حقيقي ومش اشتغاله من رباب وامها فمين اللي عمله،، اكيد لو الكلام دا مظبوط وكان بين رباب ومحمد حاجة فأكيد هو اللي عمله عشان يمنعني عنها…
وقتها دماغي كانت هتسيح لكن قررت اصبر لغاية ما أتأكد واعرف كل التفاصيل بالراحة واعرف هل أمو عارفه بالحكايات دي كلها ومشتركة معاه ولا هو لوحده اللي عامل المصيبة دي…
ويومها كانت ليلة أم محمد فبعد ما اتعشينا ومحمد خرج زي عوايده من غير ما أكلمه في حاجه
قعدت في أوضة الجلوس مع امه وبصيت لها بغيظ وانا بسألها ومركز عيني على وشها عشان أقرا ردود فعلها
_الا انتي ماكنتيش تسمعي حاجه عن رباب دي ومخبياها عني؟؟
=حاجه زي ايه مثلا؟؟
_أي حاجه تستدعي إنك تقوليهالي
فبصت ناحيتي باستغراب
=طول عمري ماليش دعوة بنسوان السوق ولا اعرف عنهم حاجه
_يعني محمد ابنك ماجاش ليكي في يوم من الأيام يطلب منك تتوسطيله عندي عشان يتجوزها…
ساعتها وشها إحمر وانفعلت وقالت
=محمد ابني انا يفكر يخطب دي،، دا لا كان يبقى ابني ولا اعرفه…
ساعتها خرجت امي من اوضتها وهي بتتعكز على عكازها وقالت
“انا سامعاكم من جوه،، محمد مين اللي يخطب دي يا واد،، ومين اللي قال لك كلام زي ده،، تلاقي رباب وامها هم اللي ملوا دماغك بكلام زي دا عشان تقول ان هو سبب المشكلة اللي عند رباب وتمسك في خناقه ويبعدوك عن ابنك ودراعك وسندك ويلقفوك هم ويستفردوا بيك
_هم ما قالوش حاجه يا أما
=ماهم مش هيقولوا بنفسهم،، دول جوز حربياات وعارفين شغل الكيد حلو اوي،، انت باين اللي عقلك خف
_جرى ايه يا أما
” بلا أما بلا وجع دماغ،، انت هتعلي صوتك عليا على اخر الزمن
_وهو انا عّليت صوتي يا أما؟!
“أيوه علّيت،، مش كده ولا ايه يا ام محمد
=لا يا حجة ما حدش يعرف يعلّي حسّه على حسّك ابدا
“روح شوف وصلولك الكلام دا ازاي وغرضهم ايه وابقا تعالى بعدها علّي صوتك عليا
_والمصحف ما علّيت صوتي يا أما
“علّا ولا ماعلاّش يا ام محمد
=ماعلّاش يا حجه
“بتدافعي عنه بردو ،، جتك وكسه انتي كمان..
وساعتها سابتنا ودخلت أوضتها بعد ما غيرت لي دماغي من تاني وبدأت أدور كلامها في دماغي،، معقول مايكونش في حاجه من الكلام دا حقيقية ومافيش حاجه بين محمد ورباب وكل دا حوار عشان فعلا أغضب على محمد واطرده خاصة إنه واضح انهم مابيطيقوهوش
كل شوية الحكاية كانت بتتعقد في دماغي لغاية تاني ليلة لما روحت شقة رباب وقعدت معاها هي وأمها،، ماكنتش راضي اتكلم قدام رباب اللي كانت لسه جروحها اللي جرّحت بيها نفسها ليلة الدخلة لسه مادبلتش وكان تحت عينيها لسه أسود ووشها أصفر ومخطوف فصبرت لما دخلت نامت وبعدها فاتحت امها في الموضوع
_الا قوليلي يا ام رباب،، هو محمد ابني كان عينه من رباب بنتك قبل ما اطلب انا ايدها؟!
ساعتها حسيت ان وشها اتغير،، لكن ردت وقالت
=مين اللي قالك الكلام دا يا ابو محمد
_أهو سمعت
=بص يا ابو محمد اللي انا عارفاه كويس وانت ماتعرفوش،، ان محمد ابنك بتاع بنات ونسوان ومن زمان مش من قريب،، ومن فترة كدة حاول يميّل دماغ رباب بنتي وانا ساعتها عرفت لان بنتي مش خايبة ومابتداريش عني حاجه لاني مربياها كويس،، فجيت في يوم جيبتهاله على بلاطة وقلت له لو ليك غرض من بنتي يا ابن الحلال،، يبقى تطلب ايدها على سنة الله ورسوله فطبعا استغرب ان بنتي حكتلي،، وعشان ينسحب بشياكة جالي بعد يومين قال لي انه عرض الموضوع على الحجة ام محمد ورفضت وانتهى الكلام على كدة،، عشان يتفاجىء بعد كدة لما عرف انك خطبت رباب وهتتجوزها وساعتها كان زي التور الهايج ويتصل بيا ويتصل برباب ويهدد ويتوعد بس احنا ماحطيناش كلامه في بالنا وبطلنا نرد عليه أصلا من بعدها…
_يعني مافيش اكتر من كدة يا ام رباب
=احلف لك على مية مصحف إنه مافيش الا كدة
_طيب يا ام رباب،، كل حاجة هتظهر وهتبان…
ودخلت ساعتها عشان أبيت في نفس الأوضة اللي ببيت فيها لكن الغـ,ـريب إني لاحظت بعد كام ليلة بيات هنا ان الليالي اللي مابحاولش المس فيها رباب ماكانش يحصل معايا فيها نفس اللي حصل لي في اول ليلة يعني كنت بنام في الاوضة الصغيرة من غير ما اشوف كوابيس ولا شيطان،، وهي كمان كانت بتبات ليلتها مع امها عادي كإن مفعول السـ,ـحر دا مابيشتغلش الا لما احاول المسها..
تاني يوم وانا في الوكالة بدأت اراجع مسحوبات محمد من كام شهر،، طول عمري عارف إنه عاقل في مصاريفه ومابيجيش ع الشغل ومن زمان اوي ماراجعتش وراه لكن لما جيت راجعت وراه المرة دي لقيته في اليوم اللي قبل جوازي من رباب ساحب عشر الاف جنيه فلما خلصنا شغلنا خدته معايا المكتب وسألته
_انت كان بينك وبين رباب مرات ابوك حاجه؟؟
=والمصحف ابدا يابا،، ليه بتسأل سؤال زي ده
