مهندس معماري

الطرقة الي قدامكم ديه استلمتها بالمنظر داه كده من شركة المقاولات الي انا شغال فيها ،زي ما انتوا عارفين اني مهندس معماري ، وتقريباً انا اكتر مهندس بيحصله مواقف مرعبة في مواقع العمل الي بستلمها ، البيت دا كان شبه مهجور من فترة كبيرة اوي وأصحابه كانوا مهاجرين وعايشين طول حياتهم في لندن لما قرروا يرجعوا يستقروا في مصر بدأوا بترميم بيتهم الي كانوا عايشين فيه في إسكندرية قبل السفر ، البيت ماشاء الله كان كبير جداً شبه القصور بتاعت زمان ، الشركة استلمت البيت وبدأنا بخلع وتفوير كل الديكورات القديمة وتغييرها بـ ديكورات احدث زي ما طلب مُلاك البيت اتعرفت على استاذ كمال الشاذلي صاحب البيت والي اداني تصور عن التعديلات الي عاوز يعملها وبدأ يشرحلي كل حاجة عاوزها بالتفصيل بس بين السطور قالي كلمة مديتهاش اهتمام وافتكرتها دعابة -يارب بس العفاريت الي احنا هاجرنا بسببها وسيبنا البلد تكون هاجرت من البيت هي كمان . قال الكلام وضحك وانا كمان ضحكت على اعتبار انه بيهزر و الموقف مر مرور الكرام ، لحد ما جالي عامل من العمال في يوم وقالي: - يا بشمنهدس هو البيت دا مسكون ولا إيه حكايته ! بصيتله باستغراب وقولته وانا مندهش وبنوع من السخرية - ليه يا فتحي ، البيت بيطير بيك ولا يكونش النداهة بتنادي عليك - يا بشمهندس من غير تريقة الله يرضي عليك ، الواد عماد المساعد بتاعي كان شغال معايا طول اليوم امبارح و بعته يجيبلنا غدا ، اول لما نزل لقيته بيرن عليا افتكرته نسي حاجة لقيته بيقولي:انا عندي دور برد و مش جاي انهارده!!! بصراحة لما قالي كده فتحت في الضحك ومقدرتش امسك نفسي - ايه يا فتحي انت متقل العيار انهارده ولا إيه ، يعني ايه كان شغال معاك واتصل بيك قالك انه مش جاي انهارده.. عفريت يعني الي كان شغال معاك؟ - يا هندسة انا فضلت اضحك زيك كده وافتكرت الواد بيهزر ، بس الواد كان فعلاً صوته تعبان وحلفلي انه مقدرش يقوم من السرير ومخرجش من البيت، دا حتي اداني ابوه يكلمني وأكدلي على كلامه... لحد ما عقلي شت ومن امبارح وانا مرعوب واعصابي سايبه ، والله يا هندسة هذا حصل . ماكنتش مصدق الي ودني سمعته يعني ايه المساعد بتاعه كان شغال معاه وبعته يجيب غدا وبعدها يكتشف انه مجاش الشغل اصلا ؟..شئ غريب اول مرة اسمع بيه ، حاولت اقنعه يشيل الموضوع من دماغه لحد ما ارجع لصاحب البيت واحكيله الي حصل جايز عنده فكرة ، اتصلت بالأستاذ كمال وقولتله اني محتاج اشوفه بكره ضروري لأمر مهم . بالفعل تاني يوم كان عندي الاستاذ كمال الشاذلي صاحب البيت ، شربنا مع بعض القهوة وحكيت ليه الموقف الي حصل مع العامل لكني استغربت من رد فعله الي اكدلي انه مصدق ويعرف حاجة بخصوص الي حصل الراجل وشه اصفر وبان عليه القلق والتوتر ، كان شارد الذهن كأنه بيسترجع ذكريات صعبة واحداث في الماضي ، تغبيرات وشه كانت بتقول كده .. - انا مش عارف ليه مش عاوزين يسيبونا في حالنا قالها بعد صمت طال لدقايق ، قالها بنوع من الكسرة وبنبرة صوت مرتجفة، استغربت من كلامه وسألته - مين دول يا أستاذ كمال؟ .. انت تعرف حاجة او عندك تفسير للي حصل مع العامل ؟ رجع سكت لحوالي نص دقيقة ، خد نفس طويل وخرجه وبص للأرض وهو حاطت إيديه الأتنين على دماغه وبدأ يحكي ، وهنا كان الرعب الحقيقي بنسبالي.. - يا بشمهندس احنا هاجرنا وسبنا البلد بسبب الي حصلنا من ورا البيت داه ، من حوالي ٢٢ سنة كنت عايش انا ومراتي وبنتي ريم الوحيدة الله يرحمها في كابوس ، كنت فاكر اني في حلم وهفوق منه ، بس متأكدش انه حقيقي غير لما بنتي راحت مني .. قال الكلام وهو بيبكي وبينشف دموعه من على خده - لا حول ولا قوة إلا بالله ، استهدي بالله بس يا استاذ كمال الاعمار ب يد الله وكلنا هنمو.ت قولتها وانا بحاول اهديه واطبطب على كتفه ، تمالك اعصابه ورجع تاني يكمل الي بدأه - بنتي الله يرحمها اتولدت مصابة بمرض نادر ، بيتصاب بيه واحد من كل ١٠٠ مليون ، لفيت بيها اوربا كلها على أمل إني اعالجها كنت مستعد اخسر ثروتي كلها بس البنت تخف بس للأسف كل الدكاتره اكدوا ان مفيش علاج لمرضها ، لحد ما في يوم جالي واحد معرفهوش بيخبط على الباب ، انا فاكر اليوم دا كويس ، الساعه ٢ بعد نص الليل ، الجو كان بيمطر ومفيش مخلوق ماشي في الشارع ، استغربت مين الي جايلي في وقت زي دا وجو زي داه ، نزلت فتحت الباب لقيت قدامي راجل عجوز ،مغطي وشه ب شال مش باين منه أي حاجة ، قالي انا عارف انك مش لاقي علاج لبنتك ريم ولا هتلاقي ، بنتك مفيهاش حاجة يا كمال ، بنتك ممسوسة وعلاجها عندي .. مضحكش عليك انا كنت عامل زي الغريق الي متعلق بقشاية ، فرحت جداً بكلامه وحسيت ان ربنا بعتهولي ينقذ بنتي ، عرضت عليه اني هديله كل الي يطلبه بس يعالج البنت ،لكنه رفض وقالي انه هيعالجها لوجه الله من غير اي مقابل ، طلبت منه يدخل ونتكلم جوه لكنه رفض ، كان شايل في إيديه حاجة شبه الشوال بس قماش ، مد إيديه فيها وطلع حباية من نبات غريب مش عارف ايه هو ، قالي اشربها للبنت ليلة اكتمال القمر وبعدها هتخف وهترجع احسن من الأول ، مسكت الحباية في أيدي وانا مستغرب من شكلها بصيت للقمر الي كان لسه بدر ، رجعت اسأله عبارة عن إيه الحباية ديه ، لكن مجرد ما نزلت عيني من على القمر ورجعت ابص عليه لقيته اختفي .. اختفي كأنه شبح مش إنسان مهتمتش للأمر ، كنت فرحان وحاسس ان الحباية ديه هي الي فيها علاج بنتي ، لحد ليلة اكتمال القمر والي كنت مستنيها بفارغ الصبر ، جبت ريم وشربتها الحباية مع كوباية ميه و تاني يوم تحصل المعجزة .. ريم خفت ، كل اعراض المرض الي عليها اختفت ، ماكنتش مصدق والفرحة مش سيعاني ..بس ياريتها ما خفت استغربت من كلامه وسألته : ليه بتقول كده يا استاذ كمال؟.. عشان يرجع يكمل كلامه - ريم اتحولت لكائن تاني مش شبه البشر ، بتفحر بـ ايديها في الأرض زي القطط والكلاب لحد ما إيديها تنزف دم ، كنت بشوفها بتمشي على الحيط زي القرود ، بتصرخ بأصوات مرعبة مش زي اصوات البشر العاديين ، في نفس الوقت كنت بشوفه .. نفس الراجل العجوز ، شايل نفس الشوال ، بيظهر واقف جنب ريم ويختفي فجأة ، ما كنتش فاهم ايه الي بيحصل ، البيت كان بيحصل فيه حرايق من غير سبب ومراتي ام ريم مرضت فترة طويلة .. كنت بشوف حيطان الحمام بتنشع دم مكون رسمة غريبة لحيوان ليه قرون اشبه بالخروف او حاجة زي كده ، انا كنت عايش في جحيم ، بشوف خيالات دايما في البيت وبشوف نفس الراجل العجوز واقف جنب ريم الي ماكنتش فاهم مالها ، بدأ يطلع ليها انياب في بوقها لدرجة انها برزت لبره بشكل ملحوظ لحد ما جيه اليوم الي صحيت فيه على صوت ريم وهي بتتألم ، دخلت عليها الاوضة لقيتها بتاكل في جسمها ، بتقطع ايديها بـ اسنانها وبتاكل فيهم كأنها وحش مش انسان ، منظر مرعب ، مقدرتش اتمالك اعصابي كنت هقع من طولي ، جريت عليها عشان الحقها لقيته وقف قدامي .. نفس الراجل العجوز ظهر من العدم ، جسمه كان خارج منه حراره غريبة زي اللهب كأني بقرب من نار ، مقدرتش اقرب ، كنت شايفها وهي بتقطع في جسمها وبتاكل اعضاءها .. لحد ما ماتت.. انا ماكنتش مصدق الي انا بسمعه ، معقول !! ..خلص كلامه وانهار في البكا وانا من الصدمة مش قادر انطق ، مش عارف اهون عليه ولا أكدبه ، ديه حكاية ولا في الأفلام ، يعني الي شافه العامل حقيقي ، البيت فيه عفاريت .. فضلت ساكت شوية بفكر وهو رجع يكمل .. - من بعدها يا بشمهندس رجع يظهر تاني نفس الراجل، بشوفه في احلامي انا ومراتي ، الدم بيظهر في حيطان البيت بينشع وبيكون رسومات غريبة مرعبة ، حيوانات ليها انياب وقرون ، مراتي ماكنتش بتلحق تفوق من المرض ، بشوف خيالات بتعدي من قدام باب اوضة النوم وتختفي ، قررت اهاجر واهرب انا ومراتي ، كنت فاكر اني اما اعمل كده ههرب منهم ، بس رجعت لقيتك بتحكيلي الي حصل يعني لسه موجودين!! طريقة كلامه وسرده بتوحي انه اكتشف حاجة في الموضوع بما انه بيقول لسه موجودين ، وعشان كده سألته : مين دول يا استاذ كمال الي لسه موجودين ، مقدرتش توصل لحاجة في الموضوع داه تعرفك سبب الي بيحصل - اخواتي ، اعمام ريم ، ربنا يجحمهم في جهنم ان شاء الله ، كانوا طمعانين في البيت ، البيت دا ابويا كتبهولي الله يرحمه وهما كان عينيهم عليه وعاوزين يشتروه وانا الي رفضت ، اذوني في بنتي وموتوها ، كانوا عاوزني ابيع البيت بأي طريقة ، دا الي قاله واحد منهم في سكرات الموت عشان يبرء زمته ، ال ٣ اجتمعوا ودبرولي سحر اسود ، لفيت على كل الشيوخ ومحدش عرف يفكه لحد ما هاجرت من البلد خالص كنت فاكر اني هرجع الاقي كل حاجة كويسة بـ.. وقبل ما يكمل كلامه سمعت صوت من الأوضة الي جنبنا الي فيها العامل فتحي ، الي حكالي الموقف الي حصل معاه ، بيصرخ بطريقة هستيرية ، قومت جريت انا وهو عشان ادخل الاوضة الاقي فتحي ماسك اسلاك الكهربا حاطتهم في بوقه ومتكهرب لحد ما جسمه اتفحم! عيني وسعت على اخرها وانا مش مصدق الي انا شايفه مستحيل حد يعمل في نفسه كده ، بصيت للأستاذ كمان الي كان عمال يصرخ ويقول - هما السبب .. هما السبب هما الي عمله فيه كده .. همال السبب.. هما الي قتلوه ومن قبل قت..لوا ريم بنتي هما السبب ، مش هسيبوا حد عايش في البيت دا الراجل كان شبه عقله طار ، قال الكلام دا وطلع يجري زي المجنو..ن ، موقف صعب على اي إنسان يستحمل يشوفه مش قادر انسي اليوم وتأثيره النفسي الي لسه طابع على قلبي ، الاستاذ كمال من بعدها اختفي محدش يعرف عنه حاجة والشركة سحبت كل العمال والمعدات لأن صاحب البيت فقدنا التواصل معاه وانا عن نفسي ماكنتش هقرب من البيت داه تاني .. مش عارف ليه انا المهندس الوحيد الي دايما بيحصل معايا مواقف غريبة زي ديه ،دا مش اول ولا أخر موقف لسه هحكيلكم حاجات كتير في مواقع العمل شوفتها ب عيني .

كنت زوجة وقد طردنى زوجى

اقل الخسا,ير

مقالات ذات صلة

اترك تعليقاً إلغاء الرد

أنت تستخدم إضافة Adblock