– مساء الخير أنا جاي اعمل بلاغ في مراتي لو سمحت
= بلاغ في مين ؟
– إيه ؟ غريبة أوي ؟ اشمعنى هما بيرفعوا قضايا خُلع ونفقة وقايمة، أنا مش هحل ودّي يا افندم لو سمحت متضغطش عليا
= يا سيدي انا فتحت بؤي ؟ ابلعها انت حُر، انا مكنتش سامع كويس بس، عملت ايه المدام ؟
– لأ متقولش عليها المدام، قول عليها المتهمة، أنا شايل منها أوي
= طب قولي الاتهامات الأول عشان اشوف هي تستاهل وللا لأ
– طب هقولك بس الأول معلش هو سيادتك دارس إيه ؟
= تجارة خارجية جامعة حلوان
– يعني مالكش في القانون خالص ؟
= يا باشا ماليش في القانون ايه، دارس قانون في كلية الشرطة
– حلو أوي، طب انا هقولك الاتهامات وانت سريعا كدا راجع معايه عقوبتها
= متقلقش هراجع معاك العقوبات وهديك ريسيت في الآخر كمان، بس احكي
– بتسجلي مكالماتي من غير ما اعرف
= طب وإيه يعني، أنا مراتي بتصورني ڤيديو من غير ما اعرف
– دي مشكلة حضرتك، المادة ٣٠٩ من قانون العقوبات بتمنع ان أي مواطن يسجل المكالمات الخاصة لأي مواطن تاني من غير علمه
= دا انت مذاكر أوي، ماشي دي فيها سنة سجن عالأقل
– طب وعشان خاطري ؟
= عشان خاطرك ايه انت هتفاصل معايه ؟ هو انا اللي هحكم عليها ؟
– ماشي، اكتب بقى عندك، انها بتستولى على ممتلكاتي الخاصة
= خدت منك العربية والشقة ؟
– لأ، خدت من عندي أربعة سويت شيرت فيهم واحد بحبه أوي، دا غير بوكسراتي اللي بتمسح بيهم رخامة المطبخ
= ما حضرتك الغلطان برضو، بتمشي من غير بوكسرات ليه وانت في السن دا ؟
– يا باشا سايبهم في الدولاب، مش هلبسهم كلهم في وقت واحد يعني
= أيوه ماشي بس قدر موقفي برضو، هكتب محضر بسرقة بوكسرات ؟ شكلي إيه قدام دُفعتي عالأقل ؟
– هي مش دي ممتلكات خاصة بيحميها الدستور ؟ المادة ٣١٨ بتقول ..
= حافظها، ودي فيها سنتين حسب تقدير القاضي، بس في حالتك دي ممكن تاخدلها شهر
– مش وحش
= معاك إيه تاني
– مادة ٣٣٧ من قانون العقوبات بتمنع التهديد اللفظي والكتابي
= هددتك بإيه يا باشا ؟
– على طول تقولي هسيب البيت وامشي ومحدش هيعرفلي طريق
= انا خايف النيابة تحول المحضر على المستشار ريهام سعيد
– يا افندم متستهونش بالتهديد دا، هو انا فاضي عشان اقعد ادور عليها بعد ما تمشي ؟
= ماشي إيه تاني ؟
– حسب المادة ١١٢ و ١١٨ القانون بيعاقب على الاختلاس
= مراتك مختلسة ؟
– للأسف أيوه، بتقلبني في الفكة اللي في جيب البنطلون وهي بتغسل
= ماشي، فيها بتاع ست شهور لو الحكاية دي بتحصل من زمان
– وإتلاف الممتلكات الخاصة فيها كام سنة ؟
= حوالي سنة، عملت إيه ؟
– كسرت مُلة السرير
= الخارجة على القانون، كمل يا أستاذ
– الت.نمر ظروفه إيه ؟
= حسب التعديل الجديد في القانون ٦ شهور حبس أو غرامة، اتن.مرت عليك ؟
– لأ، عالواد بودي ابننا، بتقوله يا حبظلم، وبما إنه قاصر ودون السن القانونية فانا اللي هرفع القضية بصفتي الوصي
= احنا كدا جمعنا بتاع ٤ سنين، كويس كدا وللا نكمل ؟
– لأ حلو أوي كدا، لما هي تدخل السجن ان شاء الله هتسقط حقوقها في النفقة والمسكن لو طلقتها، انا مش عايز اكتر من كدا
= تمام يا باشا، يا أمين سعد، قفل المحضر اللي معاك دا واطبعلي منه نسخة كمان، الواحد كان ساكت ليه دا البلد فيها قانون 😂😂😂
