طب انا بالصدفة اكتشفت الموضوع ده ، وبحاول دلوقتي أصلح أخطاء عملتها من 20 و 30 سنة !! واقسم بالله كل أعمال الخير اللي بعملها دلوقتي ومساعدتي للناس عشان أكفر بيها عن الذنوب القديمة دي !!
طيب ولو مكنتش اكتشفت كنت هعمل ايه ؟؟ يا ترى الواحد هيتفاجيء بكام حاجة يوم القيامة ؟؟؟ وكام واحد ممكن يمسكوا في رقبته وقت الحساب !!
الواحد لو كان بيعمل ذنب معين وبطله ، لكن ما مسحش أثره !! هل كدة الذنب ده اتغفر ؟! مش معنى انك بطلت ذنب انه راح أو اتمسح !!
يعني واحد (مثلا) كان بيشرب خمرة ، وبعدين بطل لأي سبب .. هو دلوقتي مش بيشرب صح ؟ لكن سنين الشرب في الماضي دي اتمسحت ؟؟ مش هاتتمسح غير لما يتوب منها ويطلب من ربنا الغفران !
طيب والذنوب اللي في حق الناس ؟؟
ركز معايا كدة :
-اتريقت على واحد وسط الناس ، اتحرج واتجرح ، سكت وعداها واليوم عدى وخلاص ، وقابلته بعديها ميت مرة .. لكن يا ترى هو سامح ؟ ولا هياخد حقه منك يوم القيامة ؟
-وانت في ثانوي عملت صوت والمدرس واقف وضحّكت عليه الفصل كله ، وهو راجل كبير في السن وعنده أولاد أكبر منك ، لكن اضطر يبلعها ويعمل نفسه ماسمعش عشان منظره أدام نفسه وأدام الطلبة !!
-استلفت فلوس من واحد وطنشت ، مبلغ صغير مش فارقة ، الناس لبعضيها !! وهو عداها على مضض لكن مش مسامح !!! هتعمل ايه ؟ هاتقدر تسددها من حسناتك يوم القيامة ؟؟
-صاحبك اشترى حاجة جديدة عجبتك ، قلتله ياريس البتاع دي تلزمني ، واخدتها منه بسيف الحياء وهو مش مسامح ، لكن عداها وخلاص عشان شخصيته أضعف منك شوية وعشان الخروجة تعدى مع الشباب !! ايه رأيك ؟ تفتكر سامح ؟؟
-دبست واحد في عزومة بالعافية وهو كان محتاج الفلوس ، لكن عداها عشان منظره أدام الناس ، لكن من جواه مش مسامح .. ايه رأيك ؟؟
“لا يَحِلُّ مالُ امرِيءٍ مُسلمٍ إلَّا بِطِيبِ نفسٍ مِنه”
“ما اخذ بسيف الحياء فهو حرام”
-واحد سألك عن حاجة تخص الشغل مع واحد ، روحت ناقل إشاعات أو أي كلام سمعته وخلاص من غير ما تستوثق منه ، فكنت سبب في وقف حال الشخص ده أو وقف خير وشغل كان هايجيله ، ايه رأيك ؟ يا ترى سامح ؟
-دخلت في تجارة مع شخص ، وبعدين حصل خسارة ، قلتله مليش دعوة أنا عاوز فلوسي ، فاضطر يتصرف في فلوس عشان ماتقولش عليه نصاب ، لكن هو مش مسامح فيها !! ايه رأيك ؟ هتقدر تسدد يوم القيامة ؟
-واحدة اتقدم لها عريس وبعدين هو اللي اعتذر ، فقررت هي وأصحابها يعاقبوه ويطلعوا عليه كلام لحد ما سوقه وقف وسنه كبر وماعرفش يتجوز !!
احسب بقا في علاقتنا الشخصية دي فيه كم مظالم قد ايه ، وافتكر إن يوم القيامة الحساب هايبقى بالحسنات والسيئات !! في عز ما انت ملهوف على حسنة واحدة تعادل ميزانك عشان تتعق بيها من نار جهنم ، تلاقي واحد جاي يقولك : اسف ، انت استهزأت بيا وضحّكت عليا الدفعة كلها ، عاوز حقي !! هات الحسنات دي !! طيب مفيش حسنات ؟؟ خير وبركة ، خد سيئاتي دي اتفضل !!!
شوف كام موقف من دول عدى وكنت فاكر الموضوع بسيط ، واستحضر وصف ربنا للناس يوم الحساب وهم بيقولوا : “ياويلتنا مالِ هذا الكتاب لا يُغادر صغيرة ولا كبيرة إلا أحصاها ، ووجدوا ما عملوا حاضرًا ، ولا يظلم ربك أحدا”
وقول الله تعالى : أحصاه الله ونسوه !! انت عملت الذنب ونسيت ، لكن ربنا مانسيش سبحانه وتعالى !
نسأل الله العفو والعافية !
انا وجعت قلوبكم معلش ، لكن الواحد لازم يراجع حساباته كويس قبل ما ييجي يوم هتتحاسب فيه بمثقال الذرة “فمن يعمل مثقال (ذرة) شرًا يره” !!
راجع معايا شروط التوبة :
-الإقلاع عن الذنب والندم عليه
-العزم على عدم العودة
-رد المظالم إلى أهلها !
طيب ماعرفتش توصل للي ظلمته : تصدق عنه وادعيله في كل صلاة ، وادعي ربنا انه يقبل منك لعله يسامحك يوم القيامة!
وربنا يتولانا برحمته 😢
