عاوز أحكيلكم على موقف حصل سببلي صدمة شديدة جدا !
من كام شهر واحد قريبي عنده 60 سنة تعب جدا ودخل العناية المركزة ! تقريبا كان واخد أدوية غلط بجرعات كبيرة فحالته اتلخبطت خالص !!
قبل ما الدكاترة يعرفوا عنده ايه بالظبط جاله حالات هلوسة وتخاريف ، كان بيفتكر مواقف قديمة جدا حصلت وهو صغير ويقعد يصرخ ويعيط عليها !!!
جاله طبيب نفسي في المستشفى وحاول يتكلم معاه ، وقال له هات ورقة وقلم واكتب كل حاجة مضايقاك بالتفصيل والمرة الجاية نتناقش فيها !!
سهر الليلة كلها يكتب ، وبعدين بدأ يبعت رسائل صوتية لاخواته على الوتس اب ، بيتكلم على مواقف حصلت من 56 سنة لما كان لسة طفل !!! كل موقف حصل فيه تنمر عليه ، أو موقف حد من اخواته الكبار شتمه أو استهزأ بيه كان بيتكلم عنه وهو بيعيط بحرقة في الفويس نوت وكإن الموقف ده حصل امبارح 😧
الغريب إن المواقف دي قديمة جدا جدا ، وكانت في مرحلة معينة من الطفولة ولم تستمر !! بعدها بفترة الشخص ده اتغير تماما وبقا ناجح في حياته والناس بتحبه وبتتمنى رضاه !! وعنده أصحاب كتير وعلاقات في كل حتة ، وعنده شركة ناجحة جدا وبيطلع في الأخبار والنت وحاجة في منتهى الجمال !! سبحان الله !!
اتصدمت إن المواقف دي لسة وجعاه رغم مرور العمر ده كله !! ورغم إن علاقته بأهله واخواته رائعة ومافيهاش أي مشكلة !! ورغم إنه إنسان ناجح جدا ومحبوب ، ومفيش حاجة من المشاكل دي اتكررت تاني على مدار 50 سنة مثلا !! سبحان الله !!
ازاي جرح في الماضي كدة يفضل مسبب ألم في أعماق وأغوار النفس ويظهر بعد العمر ده كله بالشكل الغريب ده !!!
في الحقيقة الموضوع ده صدمني جدا ، عشان كل اللي حكيته ده ، وعشان حاجة أخطر من كل ده تخصني أنا للأسف 😔 أنا زمان كنت شخصية متنمرة جدا جدا للأسف !! حياتي كلها وهزاري كله كان عبارة عن سخرية من الناس وتريقة عليهم !! طول الوقت أألف قصص وأسخر من الناس حتى من أصحابي !! ولما ربنا أكرمني بالهداية والتدين من 20 سنة ، بطلت كل ده بفضل الله ، والناس اللي كنت بتنمر عليهم في الجامعة بشكل واضح روحت صالحتهم كلهم وفضلت وراهم لحد ما سامحوني بفضل الله … لكن يا ترى هل الكل فعلا سامح ؟؟؟
بعد لما الموقف ده حصل مع قريبي ، فضلت طول الليل أفكر في الناس اللي ممكن أكون أذيتهم بكلمة أو بهزار أو بسخرية !! فضلت أحصر كل الأسماء في دماغي لحد ما صفوا على 5 أفراد تقريبا اللي فاكرهم !! منهم 2 من أقرب الناس ليا !! أخويا الصغير ، وواحد قريبي !!
قريبي ده كان أصغر مننا ، وكنا كلنا في العيلة أكبر منه ودايما نسخر منه ونتريق عليه ونهرب منه ، وسبحان الله برضه لما كبر بقا شخص ناجح جدا ومليونير ماشاء الله ، لدرجة إن أي حد في العيلة محتاج حاجة نقول له : روح اطلبها من فلان !! عادي جدا يجيب لحد هدية بـ 50 أو 100 ألف جنيه !! في جيبه زي الفكة !!
بعتله رسالة طويلة ، وقلتله أنا عارف إني تنمرت عليك كتير واحنا صغيرين (من 30 سنة) لكن أنا والله بحبك جدا جدا وعمري ما كنت أقصد أضايقك ، لكن انت عارف طيش الشباب وقلة الدين والأدب ، أنا عارف إن الموضوع فات عليه سنين ، لكن أتمنى تكون مسامحني !!!
تخيلوا رد قال ايه ؟؟؟
قال لي : بالعكس يا عمدة ، ده انا استفدت جدا من اللي عملته ده !! لولا تنمرك عليّ وسخريتك مني ، واضطهادك ليا دايما وسط الناس وانك دايما كنت محسسني إن أقل منكم ومش عاوزني ألعب معاكم ، كل ده أثر عليا جدا فخلاني أتحدى الواقع وأشتغل على نفسي جامد عشان أوريكم إني ممكن أنجح وأبقى إنسان كويس !! لولا كدة مكنتش وصلت للي أنا فيه ده !!!
أقسم بالله كلامه ده م*وتني 😨 مو*تني !! ده لسة فاكر كل تفصيلة حصلت من 30 سنة !! شوفتوا بيوصف الموضوع بالتفصيل ازاي !!!!! 💔
فضلت أعتذرله أكتير وأطلب منه يسامح ، وهو بيضحك عادي وبيقول ياعم مسامح !!
بس انا كنت بم*وت !!
التاني بقا أخويا الصغير !! أصغر مني بـ 9 سنين !!
اخويا ده كنت معتبره زي ابني !! كنت بحبه جدا جدا ودايما شايله وهو صغير وببوسه وألعب معاه ، ولما كبر كنت دايما في ظهره ، بوجهه وأساعده في اختيارات حياته وأقف جمبه في شغله ، وقفت جمبه كتير فعلا وهفضل جمبه لحد ما ام*وت !! لكن برضه كنت كتير بتتريق عليه أدام الناس ، الغلاسة بتاعت الاخوات المعروفة ، لكن انا كنت متقل العيار حبتين ! وكنت بألف عليه قصص ومغامرات ونقعد في كل اجتماع عائلي نحكيها ونضحك عليه !!!
بعتله رسالة طويلة أطلب منه يسامحني ، رد رد صعب جدا برضه
قال يا عماد انت عارف انا بحبك قد ايه ، لكن انا الحمد لله تجاوزت كل ده من زمان ومسامحك ، بس حكى برضه شوية تفاصيل م*وتتني !!
لاحول ولا قوة الا بالله 😓
