عايز استشير حضراتكم في حاجة لاني بصراحة معنديش القدر الكافي من الحكمة اني اخد قرار مندمش عليه
انا خاطب بنت قريبتي والبنت دي امها توفت وهي عندها 10 سنين يعني يتيمة وعاشت حياه صعبة مع مرات ابوها
المهم البنت دي باختصار ابن خالها بيحبها قوي بس هي مفيش مشاعر من ناحيته وكانت بتتعامل معاه عادي وانا قعدت معاها قبل كدا وسالتها علي الموضوع دا واتاكدت انه حب من طرف واحد وقولت عادي دي حاجة مش هتقلل مني
اخر موقف حصل اني كنت قاعد معاها وبقولها بعتلك رسالة علي الماسنجر امبارح وانتي مردتيش عليا فقالتلي مش عارفة هو مش شغال عندي ليه واعطيتني تليفونها اشوف مش شغال ليه وانا جوه الماسنجر لقيت محادثة بينها وبين ابن خالها زمان
كان بيسالها مالك كنتي ماشية في الشارع مخنوقة ليه فقالتله انا زهقانة من ابويا ومرات ابويا وقعدت تشكيله من حياتها وطبعا هو قعد يقولها كلام حنين علشان يشدها ليه زي علشان خاطري متزعليش نفسك وكلام زي دا
ولما واجهتها بالموضوع دا كمان قالتلي هو اللي كان بيكلمني وبيسالني وانا كنت مخنوقة ساعتها وعايزة افضفض
وانا سكت وغيرت الكلام لاني كنت متعصب ومش عايز اكلمها بطريقة تزعلها وقعدت شوية ومشيت بس كان هاين عليا اضربها بالقلم من كتر ما انا كنت غيران عليها ومضايق انها تشكيله مشاكلها
المشكلة ان البنت غلبانة وزي الملاك والله بس انا خايف اسيبها اكون افتريت عليها ومعرفش اعوضها
وفي نفس الوقت الموضوع دا حرق دمي قوي وغيرت عليها لما لقيت حد كان بيحاول يقولها كلام حلو واكيد اي راجل فاهمني
