انا مغتربه مع جوزي

مشكلة عضوة 👇👇👇👇👇👇👇👇👇

انا مغتربه مع جوزي بقالي عشر شهور

بابا اتوفي فجأة وتعبت نفسياً وجسدياً وهو منزلش قالي عنده شغل لازم يسلمه بس هيحاول ينزل يا اما يبعتلي

فعلا جيتلوا لقيت الشقه فاضيه وانا كنت موافقه واحده واحده نفرشها سوا ، بلد صعب درجه الحراره عاليه استحملت من غير تكييف نمت معاه علي الارض والله حتي ماكان في مخدات كنا بنام علي السجاده بس قدام التلفزيون

المهم كنت باخد ادويه وحصل حمل علي العلاج ومكنتش اعرف لحد ما تميت اربع شهور كنت مانعه الاكل وباخد في محاليل بس كل ده معرفش أنه حمل لحد ما حللت وعرفت

بعدها بشهر جاب مرتبه ننام عليها وفضلت كده لحد ما بقيت في التاسع اهو لسه بدأه النهارده

المهم قولتلوا انزل أولد في مصر عند اهلي قالي لا خليكي وهبعت لامك قولتلوا وظروف شغلها قالي أن شاء الله هتكون خلصت والوقت يبقي مناسب

جيت في الشهر السادس كان حملي صعب وكله مثبتات طلبت منه خلاص نفرش الشقه ونرتاح طلاما هولد هنا قالي حاضر الوقت يعدي وافكره يقولي حاضر ومفيش جديد مع أنه شغال في مجال المطابخ وأوض النوم يعني سهل يجيب الحاجات دي ، لقيت الوقت جري بيا وهو معملش حاجه

لحد اجازه العيد قالي انا هدهن الشقه وهجبلك اوضه النوم وانتريه واوضه لمامتك قولت حلو اوي ولسه فاضل شهر أن شاء الله تلحق

فعلا قلب الشقه والحمام بايظ محتاج سباكه ومفيش مطبخ

جيت في رمضان من كتر وقفه المطبخ تعبت وحسيت بأعراض الولادة ، الدكتوره قالت لازم راحه تامه البيبي نزل تحت خالص وحركته قليله وطلبت مني مثبتات

ف هو شالني في حته الاكل ، الحمد لله الاكل رخيص هنا مش غالي وانا مش بطلب حاجه معينه بقوله اللي تجيبه انا مش معترضه

جيت من كام يوم جالي طلق وحبس في البول وكنت بم*وت بمعني الكلمة سابني كام يوم كده ولما لقيتني مش قادره قولتلوا ضروري اكشف انا مش بدخل حمام ، رحت كشفت لقيت اللي غير متوقع الدكتوره بتقولي وضع البيبي مش هيكمل معاكي لميعاده ف الولادة أول اسبوع من التاسع والكلام ده بعد 10 أيام ، وطلبت تحليل للولادة وفعلا قالتلي كمان يومين تكوني هنا

قولتلوا قالي يا خبر ابيض ده مفيش وقت قولتلوا اه ضغطه فعلا

طيب يا حبيبي انت مكنتش راضي تجيب لبس البيبي واللبس بتاعي لحد دلوقتي اظن جه وقته

قالي فعلا بكره انزلي هاتي

نزلت جبت الحاجات اللي محتجاها وربنا يعلم ماشيه في الشارع بالم*وت وكل ده بسبب أنه مكانش راضي اجهز قبل التعب ده

روحت البيت بقولوا طيب كده ماما قدامها زي اسبوع وتيجي وانت سبت الشقه كده لازم تفرشها مفيش وقت وانا بتحايل عليك من بدري ، لقيته اخد الموضوع بضحك اتعصبت يابني بتضحك علي ايه والله الموضوع صعب بردوا رده بارد

لحد ما قولتلوا طيب لو مفيش فلوس اتصرف استلفهم مثلا انت موجب مع كل الناس هنا ده احنا اخدين عين بسبب انك مش مقصر مع حد ، لقيته قام قل أدبه وشتم وانتي ملعونه وعيشتك مش لزماني وانتي وانتي

رحت سيباه خالص ودخلت اوضه النوم لحد ما يهدي من التعب نمت مكاني عدي 3 ساعات مجاش قالي حتي قومي مع أنه عارف مفيش مروحه ومش باخد نفسي الفتره دي

قعد علي الفيسبوك ولا عبرني

الا بعدها بساعه جاي يقولي قومي انتى بره وانا هنام هنا

قولتلوا لا انا مرتاحه هنا علشان جنب الحمام

بعدها قومت دخلت عنده اخدت علاجي وطلعت معرفتش انام دخلت انام جنبه لقياه بيضحك علي الريلز وخلاص الموضوع انتهي قولت هو في حاله وانا في حالي

قام هو دخل جوه لما لقاني رجعت ، دخلت وراه بقولوا انت قاصد بقي ، قالي اه انا كده مرتاح ، قولتلوا لا طلاما مرتاح وكمان قولت اللي عندك ومش مستحمل اللقمه اللي بتجبهالي في تعبي بلاش تجيب ماما وانا هولد وهنزل

قالي انا بقول كده انا كنت واخد فكره غلط عن الجواز

انتي هتخليني شحات ووجودك معايا مالوش لازمه خالص مينفعش تكوني معايا في مكان بقولوا ليه كل ده انا طالبه مطبخ اقف فيه وحته اوضه لماما تنام فيها هنيمها فين

مش بطلب حاجه ترفيه ولا انت زعلان علشان لبس الولادة اللي جبتهولي ولا علشان الاكل قال اه ولما لقي نفسه هيشيل غلط قالي لا كل دي عفانه

قولتلوا اومال انا ضغطاك في ايه قالي بصراحه انا مش عايزك انتي نسخه امي وهتخليني شحات وانا واحد بدراعي قولتلوا وانا طلبت ايه لا دهب ولا حاجه فوق الطاقه يعني لكل ده

قالي لا معلش خلينا كده كل واحد في حاله لحد ما تولدي وخدي ابنك وانزلي وهبعتلك مصاريف انما تعيشي معايا لا مش عايزك والكلام بقولوا بجد اللي جوايا مش كلام زعل

رجوع لبعض لا شيلي ابنك وفلوسك هبعتهالك قولتلوا ودي تبقي عيشه احمد ربنا انت في بلد رخيصه والعيل يكبر معاك كل ده علشان طلبت مطبخ واوضه قالي لا مش مناسبني انا كنت فاهم غلط

طيب خلاص ده نطلق احسن قالي مفيش اي مشكله اطلقي وهبعتلك فلوس الولد ، بقولوا بتتكلم جد قال ايوه والله شوفي اسألي ينفع ليكي نزول في الايام دي تمام

عايزه تقعدي تولدي وتاخدي ابنك وتنزلي معنديش اي مشكله

انما انا بصراحه مش عايز

بقولوا يا اخي ده انا فاضلي كام يوم واولد هو ده ينفع حتي لو في حاجه غلط نشيل بعض ده انا لوحدي هنا

قالي لا معلش انا مش عايز انا مش فاضي للمنظره

اللي بيتكلم عن المنظره ده هو السبب في كل اللي هو فيه اي ست سهل تسحبه يعملها شغل ويسبلها فلوسه اي واحد يقولوا ادفع مكاني يدفع ، كان بيوقفني في عز تعبي اعمل عزومات والناس استغلوه ولا حد فيهم رد العزومه حتي الراجل اللي عزمناه بقي يقول لمراته ده جنتل بيعزمكم علي اكل انتي عارفه لولا الوقت متأخر كنا نزلنا اتعشينا عنده

يعني أمه لا اله الا الله مستغلياك ومراتك خلاص مبقتش تنفع

قولتلوا فين المنظره والله اساسيات وانت عارف ماما ست كبيره ضهرها تاعبها و رجليها انيمها علي الارض وانت اللي قولت بنفسك لازم نفرش

قالي لا انتي مش منسباني وظروفك مش بتاعتي اطلقي وانزلي أو انزلي بس وكده كده مصاريف ابني هبعتها

اجيبه يمين شمال يابني متشبهنيش بحد كل مره نفس عقده الام انا مش هي وحرام الطفل ده يقولي لا والله هو ده اللي لازم يحصل انا مش عايز

فوضت امري لله اعمل ايه محسسني اني قاعده مش مرغوب فيا والدنيا تقيله وكل واحد لوحده وانا كرامتي وجعتني مش قادره حتي استحمل الدكتوره لو قالتلي مفيش نزول .