السلام عليكم ورحمه الله وبركاته
والله انا طبيعيه عشان ناس كتير شايفه اللي انا عملته غريب بس احكموا يا جماعه لما الواحده تكون مرتاحه في بيت ابوها هل حتتمنى تتجوز بسرعه مظنش هو ده اللي انا عملته يا استاذه غاده كان كل ما يجيلي عريس ارفض عشان افضل عايشه في خير ابويا وحضن امي بس ارجوكم تقروا مشكلتي للنهايه على صفحتكم ازواج لكن سعداء لغايه ما اتفاجأت ان ابن عمي بيحبني ومن زمان وانا الصراحه بستلطفه بس بردو مكنتش حابه اتجوز ومع ضغط امه راح واتجوز ربنا يسهله وفضلت انا كده لغايه ما امي توفت وحسيت الدنيا اسودت في عيني والاصعب ان ابويا تعب جدا بعد وفاة امي ودخل المستشفى في العنايه المركزه
وملحقش اتوفى هو كمان بعد تلات شهور من وفاة امي وفضلت قاعده في بيت طويل عريض واخواتي اكمننا صعايدة بقو مضايقين اني قاعده لوحدي ومع زعلي تعبت ودخلت المستشفى واتفاجات بابن عمي بيزرني في المستشفى ومبين اهتمامه بيه جامد ولما خرجت لاقيت مرات عمي بتكلمني في التلفون مكالمه غريبه ان ابنها ليه حياته الزوجيه وان مراته مخلفاله اربع عيال وعايشين حياتهم في هنا قولتلها وانا مالي وماله هو زارني مره في المستشفى وخلاص اناريه راح لاخواتي من ورايا وطلب يتجوز
وفعلا لاقيت اخواتي بيعرضوا عليه وان انا سني كبر عديت ٣٦ سنه ومفيش فرصه احسن من كده طبعا بعد مكالمه مرات عمي رفضت ،بس اتفاجات ان ابن عمي تعب ودخل المستشفى عشان انا رفضته للمره التانيه لغايه ما مرات عمي كلمتني وبتترجاني اتجوز ابني عشان انه داخل على حاله نفسيه صعبه قولتاها طب ومراته قالتلي ضغطنا عليها ووافقت بس بشرط
ان ابن عمي يجيلي يومين بس في الاسبوع ومن الساعه تسعه بليل ل سته الصبح طبعا قولت ايه الجوازة دي بس لاقيت اخويا الكبير وابن عمي كل شويه زن عليه عشان اوافق فأنا بصراحه محتارة اوافق على الشرط ده وعلى فكره ده طول العمر طبعا عشان زوجته الاولى هي الاولى وهي ام العيال مع ان في الاساس لو انا كنت وافقت كنت حكون انا مكانها وعشان كده ابن عمي كل شويه يقولي كده مش كنتي وافقتي من الاول
اتمنى في صفحتكم ازواج لكن سعداء الاقي رد على مشكلتي واعتبروني اختكم في الله واسفه على الاطاله
استغفرك ربي واتوب اليك
