السلام عليكم ورحمه الله وبركاته
انا فرحي قرب كمان شهر كده باذن الله بس ادعولي ربنا يتتملي بخير لان اللي كنت خايفه منه حصل انتم عارفين المشاكل اللي بتحصل قبل الجواز دي بتبقى صعبه اوي لان توقيتها صعب اوي يا استاذه غاده واتمنى الاقي حل سريع عندكم على صفحه ازواج لكن سعداء
انا ابويا جهزني الحمد لله احلى جهاز بس عشان امي كمان بتشتغل وانا بنتها الوحيده جبتلي حاجات بالزياده في جهازي ولاقيتها كمان فاجأتني ساعه الفرش ان في سيده مشهورة من بتوع النت حتيجي تفرشلي شقتي والصراحه الست ذوقها عالي جدا وجت تفرشلي وتفتح كل العلب وحطت كل حاجه في مكانها المناسبه بس اتفضل كام حاجه قالت لماما الحاجات دي زياده عن اللزوم وملهاش مكان احطها فيه ،قامت ماما عادي قعدت تعلب وتكيس الحاجات بس فجأة حماتي طلعت وامي بتلم الحاجه قالت لها انتي بتتعملي ايه يا حاجه قالت لها الحاجات دي زياده حشيلها راحت حماتي مسكت ايد المكنسه
وقعت تلم الحاجات وشديتها من ايد امي وقالت لها ندخلها تحت السرير اصل مينفعش تاخدي حاجه ابني ماضي عليها في القايمه ،راحت امي قالت لها بس الحاجات دي انا جيباها لبنتي من فلوسي ومش مكتوبه في القايمه قامت حماتي قالت لها واحنا ايش عرفنا الحاجات دي لو متسابتش في مكانها مش حيحصل طيب راحت الست اللي بتفرشلي قالت لها يا حاجه دي حاجات زياده عن اللزوم وملهاش مكان وعادي ممكن ترجع لانها بكيستها ،انا قعدت اهدي في حماتي بس هي مصممه تكلم ابويا وتعرفه اللي حصل وطبعا امي جابتلي الحاجات دي من ورا بابا ومن فلوسها بس بابا لو عرف حيبهدل امي وحيقولها انتي كلفتيني وانتي جايبه نفس الحاجات وبزياده وتبقى مشكله كبيره ،انا عارفه ان متابعين صفحه ازواج لكن سعداء معظمهم
ازواج واكيد مر عليهم حاجات زي كده ياريت تقولولي اعمل ايه حماتي مصممه ان الحاجات دي تتساب عندي وحتبقى تسأل ابنها عليها وتتاكد اني مش حرجعها لامي ،وامي صعبان عليه عايزة تاخد الحاجه وترجعها بطريقتها لانها تعرف الناس اللي اشتريتها منهم ،وحاليا الجوازة واقفه على اللي حصل ومش عارفه اتصرف ازاي
لا حول ولا قوة الا بالله العلي العظيم
استغفرك ربي واتوب اليك
اللهم صل وسلم وبارك على سيدنا محمد وعلى اله وصحبه وسلم
الحمد لله رب العالمين
