مساء الخير .. الموضوع طويل شوية ف اتمنى محدش يمل و اتمنى نصيحة حقيقية من القلب .
انا اتجوزت صاحبي و حب عمري من ٩ سنين ، مرينا بكل شئ حلو و مر سوا ، كان و نعم السند و الداعم ، و مأسسين مشروع سوا من قبل الزواج و مستمر الحمدلله .
اخر ٣ سنين كنا بنمر في علاقتنا ، و انا اتحولت لشخص عصبي و متحفز طول الوقت و بزعل لأتفه الاشياء ، و شك و غيره طول الوقت على مفيش للأسف ، و انا تداركت ده متأخر .
عندنا بنوته ٥ سنين و اول السنة ربنا كرم بحمل ، اضطريت اخد اجازة من الشغل و هنا بدأت اعصابي تهدى شوية ، و بدأت ابص على رسائلنا القديمة و اد ايه كان بيبعت يقولي أنه مفتقد الونس و الراحة معايا و انا كانت ردودي هجومية جدا .
شهر ٥ بدأت أحس أنه بيبعد ، بحاول اقرب بس هو يقرب حبه و يبعد حبه و بدأ ضغطه يعلى و يقولي انا حاسس ان في صر..اعات جوايا ، بدأت أحس أن في حد ف حياته و سألته بشكل واضح و قال إنه لأ .
لحد ما في شهر ٨ اتأكدت أنه مرتبط ببنت من محافظة تانية و كان بيسافر كل ١٠ ايام او اسبوعين علشان يقعد معاها شوية و طبعا فون و واتس ، و ده كله بيتمسح أول بأول .
واجهته و الموضوع كبر هو من اول يوم كلمها و نهى كل شئ ، و انا احساس الإنكار جوايا فضل يزيد يوم عن يوم لحد ما وصلت لانهيار عصبي ، خلال الفترة دي كان هو بين سكوت تام و محاولات للقرب أو خناق مع أنه يقول أنه مش عايز يكمل معايا .
و يرجع يقول انا كل اللي عايزه نقفل الموضوع و انا هنسيكي و مش هكسرك تاني ، و انا ما بين أن ألقى كويسة و اتناسى يومين و ارجع تاني اني افتكر كل التفاصيل اللي حكالي عليها .
كنت عارفة كل باسوورداته تليفونات و لاب و كل حاجه ، غيرهم كلهم ، و رجع ف نص المسافة فتحهم ادامي ، و لما حصل بينا شد و مشكلة تاني علشان بفتح للموضوع غيرهم تاني .
خلال الفترة اللي فاتت و فترة سكوته للأسف انا مكنتش عارفه اهدى ف حكيت لاهلي و أهله و شبه حكيت لمعظم أصحابنا المشتركين و هو شايف أن دي اهانه ليه .
انا الحمدلله ولدت من اسبوعين ، و بعد الولاده بقيت اهدى و تداركت غلطي ، بس علاقتنا بقى فيها شرخ كبير .
هو بيحاول يتصرف عادي ، بس عارفين لما ببص في عينه بشوف نظرة كسرة ، وقت غضبي بشوفها حزن على اللي كان يعرفها و وقت هدوءي بشوفها كسرة من اللي حصل .
اعمل ايه !؟ اتخطى ازاى و اداوي اللي حصل بينا ازاى ؟
