عدلي كاسب – ما.ت زي ما اتمنى
الراجل دا بشوفه ملبوس.. يقدر يقنعك باي دور مهما كانت طبيعته.. يعني مثلا هو رئيس التحرير المهفوف بتاع بللم في طاقية الاخفاء… وهو الجزار اللي بصاته مر.عبة في السفيرة عزيزة … وهو الخال الفاني في العريس يصل غدا.. وهو ابو لهب.. بمناسبة ابو لهب بقي.. تعرف انه كان بيكره ابو لهب… واقولك ليه بس اصبر عليا.
عدلي كاسب كان راجل جدع بيحب بيته قوي.. وكانوا صحابه عبدالمنعم إبراهيم، وشكري سرحان، وسعيد أبو بكر، وإبراهيم سعفان، وكان بيحب الأستاذ حسن فايق قوي .. كان بيحبه حب الأستاذ، ولما أصيب حسن فايق بالشلل النصفي في نهاية حياته، كان عدلي كاسب الفنان الوحيد اللي بيزوره باستمرار في بيته.. ويميل عليه ويقوله عايز حاجة يا عم حسن.. وياخد القعدة معاه ويمشي… اصل الشدة هي اللي بتبين المعادن.. طول ما انت شغال والاضواء حواليك.. فيه اصحاب زفة كدابة.. لكن اللي يفضل يود ويسأل وانت محيلتكش حاجة دا ابن اصول وصاحب بجد.
عدلي كاسب كان ليه روتين انه كل جمعة مهما كانت مشاغله، انه يروح يصلي الجمعة في مسجد سيدي الأنصاري في منطقة مصر القديمة، وبعدين يقابل أهل المنطقة ويسلم على الناس وكان كل خميس لازم يروح يصلي في مسجد الحسين.
الناس في الشارع كانوا ينادوه باسماء شخصياته بس كان بيزعل لما حد يقوله ابو لهب.. وهقولك ليه بس كمل.
المهم، ربنا كرمه واتشهر و طلع معاش من وزارة التربية والتعليم، وانتقل لفيلّا 14 غرفة في منطقة (حدائق القبة) في القاهرة وفيها 7 خدم.. وعربية حلوة.. وفي يوم كان في العربية مع ابنه كاسب.. ولقوا مهرج من اللي بيلفوا في الشوارع.. فدا راح راكن العربية ووقف يتفرج فابنه بيقوله ليه احنا مش فاضيين.. فقاله: ” يا بني ..دا فنان .. يعني زميل ليا بيعرض فنه لازم أشجعه”..
المهم اتفق معاه ابراهيم الشقنقيري، على عمل بطولة حسن يوسف، وهو بيعمل بروفات حس بنغزة في قلبه، روح البيت، هو كان خايف قوي من موضوع القلب دا، عشان كان ليه 3 أخوات (طه واحسان وعطية). كلهم جاتلهم السكتة دي وما.توا بيها.. وهو كمان ما.ت بيها..
فهو كان نفسه يمو.ت وهو مبتسم وهو بيسمع الشيخ عبد الباسط عبد الصمد… فكان قبل ما ينام يعمل الابتسامة ع وشه وينام ويشغل اذاعة القران.. وفي يوم الأجل شغل عبدالباسط عبدالصمد اللي كان لازم ينام وهو بيسمعه.. وابتسم الابتسامة اللي ما.ت عليها… وجم يصحوه لقوه مي.ت وهو مبتسم وصوت عبد الباسط عبد الصمد جنبه..
وكان دايما يقول يا رب انا مبسيبش فرض.. ليه الناس تعرفني بابو لهب.. كان راجل مصلي ومواظب على الصلاة في ميعادها في الجامع، مش عايز الناس تربط بيني وبين ابو لهب…
من شغلي في ارشيف الفن ملقتش ليه خناقة مع اي فنان وكان حريص اي فنان يقع يوده ويسأل عنه ويساعده باللي فيه النصيب.
عدلي كاسب خلف اربعة ممدوح خريج تجارة، و(كاسب) خريج كلية الفنون الجميلة، (أمينة) خريجة الفنون جميلة، و(إيهاب) خريج كلية الاعلام… ممدوح كان غاوي فن.. شفت انت مسلسل عباس الابيض في اليوم الاسود.. مش كان فيه راجل عايز ياخد بالتار من لطفي الجنايني اهو دا ابنه ممدوح.. ما.ت الله يرحمه سنة 2014 (صورته اول كومنت).
الله يرحم عدلي كاسب وممدوح ويصبر اللي عايشين…. ممثل من العيار تقيل قوي.. اللي تقدر تحمل عليه وهيفاجئك بحاجات مكنتش تتوقع انها عنده.. كان موهوب بزيادة
قولولي بقى فاكرين ايه من أدواره
#بهاء_حجازي
