#مشكلة
السلام عليكم ورحمة الله وبركاته
انا تعبت والله ، متجوز من اقل من سنة
مراتي تركيبة غريبة اوي
هي مش من النوع اللي بيحب المشاكل .. هي كويسة وبنت ناس وبنحب بعض .. لكن لما تحصل مشكلة .. مابتعرفش تتعامل بهدوء .. مينفعش تعاتب .. او حتى تتخانق بس على اد المشكلة .. يعني لو حاجة صغيرة تبقى خناقة صغيرة لو حاجة كبيرة تبقى الخناقة كبيرة .. لا سواء حاجة صغيرة او كبيرة بتولع فيا وفي البيت كله خناق وزعيق وعياط ونكد
الحل ايه ؟
الحل حاجة من خمسة :
اسكت واهاودها بكلمتين حلوين ؟؟؟ ،، ذكية وبتفهم ومابتتاخدش على اد عقلها وببقى كأني ماقلتش حاجة
اناقشها بالمنطق ؟؟؟ كلنا عارفين منطق البنات بيروح فين لما يتخانقوا .. كل الكلام مش منطقي اساسا
اندمج في الخناق قصادها ؟؟؟ ممكن تفضل عشر سنين الخناقة مش هتخلص ..
اصدها واشكمها زي ما بعمل مع اجدعها راجل بشنبات ؟؟ بتنهار عياط وممكن توصل لانها يغمى عليها
اقولها .. انا غلطان .. انا اسف ؟؟ .. مابتقبلش الاعتذار
جربت كل حاجة .. اعمل ايه طيب .. ؟
عشان الناس اللي هتفهم غلط .. هي حساسة جدا .. وبالتالي لو صوتها علي ولا غلطت ف الكلام وهي بتولع ف البيت كدا .. لو كلمتها بحدة بس شوية بتعيط وتنهار وتكتئب .. لو زعقتلها ولا المشكلة سخنت ودخلت فيها كمان شوية .. ممكن تفضل تعيط لحد ما يغمى عليها
وعلى اد ما هي حساسة .. هي مدفع رشاش كدا في اي حاجة تضايقها من اي حد ..
يعني مدفع رشاش في اي حد ف بتعمل مشاكل كبيرة … وحساسة جدا اي رد فعل ضدها بتنهار خالص
هي كدا تركيبة غريبة
ملحوظة : محدش يقولي هرمونات عشان الكلام دا بيحصل في غير اوقات الهرموناات …. وقت الهرمونات الدنيا بتبقى انيل من كدا ١٠٠ مرة بس مش مهم انا راضي
انا والله شخص لين وهين مع الناس كلها .. وهادي بطبعي وبحل الامور بالهداوة وبالعقل .. ببقى لين معاها قدر المستطاع حتى ف عز المشاكل .. وحاجة كبيرة اوي عندي انها تعيط ولا تنهار كدا .. والله ربنا العالم ان كل المشاكل دي ببقى مش عايز حاجة غير اني اشوفها راضية
بس هي ما بترضاش ! .. بتفتح عليا النار .. ومابتتكلمش بالعقل .. ولا بتقتنع بمبررات حتى لو حقيقية .. ولو اعتذرتلها ترفض اعتذاري ..وبترمي الدنيا ف وشي وتتقمص ومطلوب مني اصالحها .. وياريتها بتتصالح !
مانا مش هفضل نص حياتي بصالح واراضي فيها شوية .. واستحمل النار اللي بتفتحها عليا شوية
وبعدين ياخوانا هي فعلا فعلا بتزعل م االهوا .. والله شكيت في قوايا العقلية م اللي بيحصل
اعمل ايه طيب .. انا لو حاجة مش عاجباني ف حياتنا مابعرفش اظبطها .. بسبب انها مابتستحملش اي كلام
وبسكت وبقول طالما هي كويسة خلاص كله هيتحل في وقته
طب انا هفضل لحد امتى كدا ؟
طبعا ناس كتير هتقولي اشكمها وسيطر وادي ع الدماغ وكدا .. هقولك لو انت مراتك بيغمى عليها لما تشد عليها .. هتسيبها تتحرق المهم شنبك يبقى مبسوط ؟؟ انا مش هعمل كدا … انا فيا مرونة كافية اني اتصرف باي شكل
انا اعصابي تعبت .. وبقيت حتى واحنا مبسوطين مش مدي أمان .. لأني لو هرشت ممكن تزعل وتقلبها نكد .. اسف ع الاطالة جدا .. بس اللي فهم حاجة من كلامي دا يدلني اتعامل ازاي .. انا مبقيتش عارف اعمل ايه
مش عارف استشير اهلي عشان مادخلش اهلي ف خصوصيات بيتي … ولا اصحابي لاني مش هتكلم عنها قدام صحابي .. ولا معايا فلوس اني اروح لمتخصص .. قلت استشيركم … ساعدوني 🙏
