مثلت اني مل,حد بعد ما هربت من البيت عشان الاقي سكن
عارف ان اللي عملته غلط ومش نضج بس التجربة دي هتغير وجهة نظرك في حاجات كتير مهم صدقني تقراها
دخلت على 2018 سنة جديدة بقا وبداية جديدة وهعيد تالتة ثانوي وانا جاهزلها ومستعدلها ومش هركز في حاجة غير نفسي ومش هخلي جو المراهقة والهرمونات تأثر عليا زي السنة اللي قبلها اهم حاجة مستقبلي دلوقت روحت المكتبة اشتري كذا نوت بوك صغيرة عشان اكتب الملاحظات في الدروس ونوت بوك كبيرة وقلم نضيف حجزت عند المدرسين اللي ارتحت معاهم في السنة اللي قبلها.
كنت بادئ وانا متحمس وبذاكر الدرس بدرسه وبحل اللي عليا كل حاجة كانت كويسة في الأول بس مع مرور الوقت مكنتش عارف اواكب اللي عليا زي بقيت زمايلي، انا للأسف عندي مشكلة مأزمة حالتي مع الدراسة وهي ذاكرتي السيئة ومعاناتي مع الحفظ ملازماني من صغري في إني معرفش افتكر إلا الصور والالوان ومفتكرش حاجة شكلها مش مميز وموراهاش قصة زي الحروف والرموز، انا إخترت أدخل علمي علوم والاختيار ده اخترته وانا تايه ومش واعي لخطورة الاختيار ده الا بعدين فهموني ان كليات القمة زي ما بيسموها لو موصلتلهاش يبقا انا هبقا ولا حاجة ومعنديش مستقبل وهكون ضعت وراحت عليا ومستحقش ابقا بني ادم زي ولاد خالتي اللي فيهم اتنين دخلوا طب انت مش اقل منهم ولا هم احسن منك عشان يوصلوا لكليات القمة وانت لا.
فأيأس من نفسي ومعرفش احفظ الكام معادلة بتوع الكيميا اللي مش عايزين يدخلوا دماغي مهما عملت ففكرت استغل اني برسم واخلي كل عنصر من العناصر الكيميائية بشخصية بتتكلم وتتفاعل مع التانية، مش هكدب عليك انا بقيت حافظ المعادلة احسن من اسمي بس للأسف اللي كنت بعمله ده بياخد وقت كبير اوي عشان اعمله غيري بيحفظه في اقل من 5 دقايق.
روحت امتحان الكيميا وانا مش حافظ الا اول درسين بس وباقي زمايلي حافظين لحد محنا واقفين، استلمت ورقة الامتحان فيها مسائل انا مش فاكر منها حاجة وعاجز قدامها فضلت 3 ساعات بس باصص في الورقة واراقب اللي حواليا واقلامهم وهي مش بتتشال من الورق لحظة، استحقرت نفسي ساعتها وحسيت اني متأخر عقلياً وكنت بس بتمنى امشي من الدرس دلوقت حالاً مستني بفارغ الصبر الامتحان يخلص واسلم الورقة وفيها نقطتين بس محلولين، روحت البيت دورت عالنت حاجات تحسن الذاكرة قريت مقالات كتير ونزلت ابز كتير اقنعوني فيها اني لو استمريت في استخدام العاب الذاكرة دي هيبقا فيه تحسن ملحوظ، حاولت أخصص وقت عشان الالعاب دي بس مش بلاقي انسب من اني ألعبها في النص ساعة رايح جاي بتوع المواصلات.
بعد إمتحان الكيميا ده طبعاً مرجعتش عند المدرس ده تاني عشان كان بيحاسب كل واحد على الدرجة اللي جايبها ويكلم أهله، اتفقت مع امي اني هروح درس الكيميا خاص لوحدي وحصل والمدرسة الجديدة بدأت تفهمني الكيميا من الصفر والامور كانت ماشية تمام ده غير اني مكنتش كويس في الفرنساوي عشان مش عارف اتفاهم مع اللغة دي كانت مستفزاني لاقصى درجة بسبب الحروف الكتير اللي مبتتنطقش ولازم احفظها برضه على عكس الانجلش كان سهل بالنسبالي عشان كل نطق ليه حرف فبرضه روحت درس فرنساوي خاص.
اهلي قاعدين يصرفوا عليا مصاريف قد كده للسنة التانية على امل اوصل للي هم نفسهم فيه وانا مكنتش عارف انا نفسي في ايه، المهم حتى بعد ده كله كنت مطفي ومش بأدي كويس في الدروس ومش بحل حاجة ورا حد وبطلت اروح عند المدرسين اللي بتضرب عشان ابقا حر كده كده مش عارف اواكب زمايلي هقعد اتضرب عالفاضي والمليان، في يوم قررت اني مروحش اغلب الدروس الا الدروس اللي بروحها خاص وفتحت اللاب افك عن نفسي شوية كان عندي هواية مهووس بيها اني انزل العاب سونيك اللي مش بتشتغل او مش معمولة للكمبيوتر وانزل ليها محاكيات واقعد ازبط فيها وانزلها تولز وهاكات وازبط الكونترولز والجرافيكس لحد ما اللعبة تشتغل زي الفل عالكمبيوتر واقعد اعيش معاها واختمها، بعد مخلصت قفلت اللعبة فتحت النت اسكرول شوية لقيت اعلان لموقع كورسات اسمه يوديمي منزل كورس عن تعلم تطوير الالعاب وتعلم لغة السي شارب المستخدمة فيها من الصفر.
الإعلان ده بقا هو نقطة التحول في حياتي لما فتحته لقيته بفلوس طبعاً وانا طالب لسة معرفش حتى اشتري فردة شراب لنفسي، فحاولت انزله مقرصن بالسابتايتلز، فتحت اول فيديو وعينك ما تشوف الا النور حسيت اني دخلت الجنة وهو قاعد يوريني محرك الالعاب والالعاب الكيوت البسيطة اللي هنعملها مع بعض واللي كانوا بيشرحوا كانوا ناس لطيفة وفريندلي، صراحةً انا حسيت ساعتها اني لقيت نفسي بعد مكانت تايهة مصدقتش نفسي هو ده كان موجود وانا مكنتش عارف ازاي بس طيب، وكنت بتعلم بحماس ومركز وبطبق وبحس كل قدراتي اللي اتولدت بيها اتعملت واتخلقت عشان الحاجة دي بس، كنت برسم شخصيات ثري دي وتو دي واصمم الانفايرومينت بتاعت الليفيل وازبط اللايتينج واعمل ساوند ايفيكتس غير اني حبيت الاكواد مع انها رموز وارقام بس كنت فاهمها وبفتكرها بسهولة عشان ليها معنى وقصة كل كود بيحرك حاجة في اللعبة.
