مش قادرة أثق في جوزي تاني
أنا عندي 37 سنة ومتجوزة جوزي اللي عنده 40 سنة بقالنا 12 سنة. اتعرفنا على بعض في الجامعة ونعرف بعض بقالنا 17 سنة. أنا جاية من عيلة أقل من المتوسطة، وفي الجامعة كنت متبهدلة ومش عارفة أخلّص المصاريف خصوصاً بعد وفاة والدي اللي كان المسؤول عن دخل البيت. كان عندي ديون كتير من الجامعة ودراسة الطب، وكنت شغالة ٣ شغلانات عشان أساعد نفسي وأمي. وكنت متبهدلة بين الشغلانات التلاتة، ورعاية أمي، والدراسة، فما كانش عندي وقت لنفسي وكنت فعلاً في أسوأ حالاتي. جوزي شاف اللي كنت بمر بيه وكان بصراحة السبب الوحيد اللي خلاني أكمل. من وقت ما كنا صحاب لحد أول سنة من علاقتنا، عمري ما زرت بيته ولا شفت عيلته. كان دايماً يقولي إنه عنده مشاكل معاهم وبيكسف يوريني بيته عشان فقير. في الوقت ده كنت بحس بالذنب ناحيته، وكنت أحياناً أشتري له أكل ولبس عشان كنت فاكرة إننا زي بعض ومش عايزة أشوفه يوصل لحالتي.
قابلت عيلته لأول مرة وأنا عندي 24 سنة. والدته ووالده كانوا طيبين جداً وبيتهم كان حلو جداً. كان عكس تماماً اللي حكى لي عنه، بس قلت يمكن يكون بيمر بحاجة محدش يعرفها، وما كنتش هشكك فيه. من بعد المرة دي ما شفتش والدته ووالده كتير. من بداية علاقتنا لحد النهارده كنت دايماً فاكراه بيعمل اللي يقدر عليه عشاني. كان بيحكي لي عن شغله في المكتب، والترقيات، والقصص اللي بتحصل هناك، وكان بيبان إنه صادق، لدرجة ما فكرتش في أي حاجة. حتى لما الكورونا جات، وقال إنه فقد شغله، وقفت معاه وساعدته بفلوسي. كنا بنعـ،ـاني وقتها، بس كان بيطمني إننا مع بعض.
بس من شهر كده، جوزي قعد معايا وقال لي إنه كان بيكدب بخصوص الفلوس، وإنه ما كانش فقير، وما فقدش شغله أيام الكـ،ـورونا، وما عندوش مشاكل مع أهله. قال إنه كدب عشان يتأكد إني مش بتجوزه عشان فلوسه. لما قال كده، أنا اتعصبت جداً. مفهوم إنك تخبي وضعك المادي في الأول، بس بعد ١٧ سنة لسه شايفني ممكن أكون مهتمة بفلوسك؟ بعد كل التعب اللي شفته، كنت لسه مخبي عني الحقيقة وبتعمل دور اللي بيبذل كل اللي يقدر عليه عشاني؟ كل ده خلاني أفكر في خاتم الخطوبة. هل الحجر الصغير كان رمز لتعبك، ولا رمز لعدم ثقتك فيّ؟ الأفكار دي كلها كانت بتدور في دماغي وقررت أسكت أسبوع وبعدها رجعت وطلبت منه يوقّع على ورق الطلاق.
قال لي إن ده مش ذنبه وإنه كان بس عايز يبقى واثق فيا، وطلب مني أعيد التفكير. أصحابي بيقولوا لي إنه كان كويس معايا قبل كده، ومش لازم أطلّق لمجرد اكتشاف الحقيقة دلوقتي. أنا عارفة إن من حقي أكون متضايقة، بس هل الطلاق قرار مبالغ فيه؟ يعني، إزاي أقدر أثق فيه بعد كده؟
#حواديت_الاجانب #قصص #ريديت
