نورهان سمعت إيه بالظبط؟
يمكن قصدها على الكلام الباطل الـ قاله هاني على مروة؟
سألتها وقلبي بيرجف “سمعتي ايه مش فاهمة؟”.
شغلت تليفونها وقالتلي اسمعي كده المكالمة دي.. أنا كنت عاملة تسجيل المكالمة علشان لو فاتتني حاجة وانشغلت عنك.
وفتحت تسجيل صوتي خلى ظهر فيه صوتي وأنا بشد مع هاني وبقوله سيب دراعي لو سمحت.. وفجأة سمعت صوتي وأنا بصرخ وسكوت دام حوالي دقيقتين كده.. بعدين هاني تقريبًا عمل مكالمة هاتفية وقال بالنص:
“ايه يا منة.. أنا عملت كارثة تاني، شهيرة كانت هنا وشمت ريحة مروة.. معرفتش اعمل اي حاجه غير أني ضربتها على دماغي جامد ووقعت من طولها.. أنا مش عارف اعمل ايه.. انا مش كل يوم هـ.ـقت*ل واحدة أنا اعصابي متدمرة أصلا من جثة مروة في البيت.. يعني اعمل إيه دلوقتي.. ما أنا لو روحت في داهية مش هروح لوحدي، وهقول انك انتي الـ جبتيلي تسجيل من عشيقها بيقول أن مروة لسه معاه وبتكلمه.. أنا حاولت أعملها مليون لعبة وفخ يمكن تمو*ت لوحدها لكن لما ملقتش فايدة خنقتها وانتي شجعتيني على ده وكنتي بتديني افكار ازاي اتخلص منها.. منة أنا مش هـ.ـقت*ل حد تاني، وهرمي شهيرة برا البيت وهسافر كأني ماكنتش موجود وكل دي اوهام حصلتلها وخلاص.. وهبعت رسالة من تليفون مروة دلوقتي اقولها أنا مسافرة مع جوزي يومين.. بس لو حصل أي حاجة غير ترتيبي أنا مش هسكت وهقول انك شريكتي، ومتنسيش أنك في الخطوبة كنتي بتحاولي تلفي عليا لانك بتحبيني وانا حافظت على سرك ومقولتش لأختك لولا أنها طلعت من نسل ابليس زيك.
انتهى التسجيل وانا دموعي بتجري على وشي بدون إرادة مني.. معقول أخت تعمل في أختها كده؟؟
معقول تشكك جوز أختها في اختها لمجرد مشاعر قديمة كانت جواها ناحيته؟!
إزاي قدرت تحط خطط لهاني علشان يخلي اختها تمو*ت بأي شكل يخرجهم من الشُبهات.. ازاي اتحملت تعرف أن اختها ميتة في بيتها من اسبوع ومتحملة تسكت وتغتاب في سيرتها كمان!
كل دي كانت لعبة حقيرة من واحدة عديمة الدين والتربية وراجل بلا عقل وقلب مشي وراها وصدقها، لعبوا لعبة حقيرة هو يقول مراتي غضبانة من اسبوع والتانية تقول مجتش عندي علشان قدام الناس مروة تكون الشيطان الوحيد في الصورة.
لو هنقول أن الخوف كله من أزواج اليومين دول والكوارث الـ بنشوفها، زي الـ بيرمي مراته من البلكونة والـ بيصورها تحت التهديد وخلافه..
هنقول كمان أن الخوف بقا أكتر من الـ من دمك والـ شايفينك في خير وفاكرين انك خدت نصيبهم في الدنيا بدلاً عنهم.
ربنا يكفينا شر النفوس الخبيثة، ويسترها علينا في زمن مرعب مبقاش فيه أمان لقريب أو غريب.
گ/#شهيرة_عبدالحميد
دمتم في سلام.
