مش عارف ان كان ينفع احكي ده ولا لا بس هحكيه من حوالي ٣ سنين تقريبا بيبعتوا ليا في البنك ويقولولي انك اتخصص لك شقة تبع الاسكان الاجتماعي وانا كنت مقدم علي الشقة ديه من ٢٠١٦ فأنا أصلا كنت نسيت الموضوع ده فروحت البنك عشان اعرف المقدم اللي هيتدفع كام فكان في زمايل ليا معايا في المصنع كانوا مقدمين معايا وجت لهم قبلي فسألتهم ففي اللي يقولي دفعت ٨ آلاف واللي يقولي مدفعتش خالص وخدت دعم كمان منهم ٢١ ألف جنية واللي يقولي مش عارف ايه فالمهم أنا كنت رايح البنك اني على أقصى تقدير يوم ما هأدفع فهدفع ١٠ أو ١٥ ألف وانا كان معايا تحويشة العمر ٢٧ ألف جنية اول عن اخر فروحت البنك فقالولي انت هتدفع ٤٠ ألف جنيه فحرفيا وداني سخنت وقولت لهم إزاي يعني فالموظفة قالتلي انت دلوقتي مش عقد في شغل جديد قولت لها ايوه فقالتلي إحنا بتتعامل مع العقود علي أنهم أصحاب مهن حره فبنحاول نأخد أقصى مبلغ منهم عشان نقلل القرض اللي هيتأخد فقولتلهم طب مفيش دعم زي زمايلي بتوع المصنع فقالولي لا وهو ده اللي عندنا.
خرجت من البنك بأضرب أخماس في اسداس ومش عارف هجيب ال ١٣ ألف الباقية ديه منين فحد كده هيقولي يا كابتن مصطفي انت كنت شغال بقالك ١٠ سنين فوديت فلوسك فين فهقولك حكمة سمعتها زمان بس مقدرتهاش غير ساعة العجز بتاع الفلوس والحكمة بتقول :-
” مرتب الحكومة لا يغنيك ولا يحفظك من الفقر”
يعني بالبلدي كده اللي معظم اعتمادهم علي مرتب الحكومة بيكونوا علي حافة الفقر أو بمعنى آخر لو حصل لهم أي أزمة بيكونوا فقراء بجد وانا أقصى مرتب خدته بعد ١٠ سنين شغل كان ٣ آلاف جنية فكان الوضع بالنسبة ليا ز فت المهم روحت استلف من واحد صاحبي ٥ آلاف جنية قالي مش معايا فقولتله يا ابني راجع نفسك فقالي والله ما معايا فوالدتي كان عندها جنيه دهب من زمان اوي فقولت لها ما تبيع الجنية الدهب ده عشان اكمل علي تمن الشقة فبيعت امي الجنية ب ٥٨٠٠ ودورت يمين وشمال لحد ما ربنا كرمني بالسبع آلاف الباقين ودفعت المقدم وقعدت مع نفسي كده وقولت يعني يا رب مبلغ بسيط زي ده محتكمش عليه بعد شغل ١٠ سنين ولولا ستر ربنا مكنش هيكون معايا حاجة خالص وفي عز أفكاري لقيت والدتي بتبعتلي فيديوهات من الفيس عن الرزق فلاقيت فيديو لشيخ بيقول لو أردت أن ربنا يوسع من رزقك ويقضي دينك قولي الأدعية ديه:-
الدعاء الأول
“كريم رسول الله والله أكرم وهل فقيراً بين الكريمين يُحرم”
الدعاء الثاني وهو أشبه ما يكون بالورد يوم الجمعة وده تقوله ما بين العصر والمغرب وهو:-
“استغفر الله العظيم الذي لا إله إلا هو الحي القيوم”
مائة مرة
“اللهم صلي وسلم وبارك علي سيدنا محمد صلاة تنحل بها العقد وتنفرج بها الكرب وتقضى بها الحوائج وتنال بها الرغائب”
مائة مرة
ثم تقول الايه الكريمه من سورة الكهف
“ربنا آتنا من لدنك رحمة وهي لنا من أمرنا رشدا”
مائة مرة.
ثم تدعي باللي نفسك فيه وربنا هيحققه لك بإذن الله
الدعاء الثالث يوم الجمعة أيضا
“اللهم اكفني بحلالك عن حرامك، وأغنني بفضلك عمَّن سواك.”
سبعين مرة.
فأنا بقيت اقول الدعاء الثاني كل جمعة تقريباً ومش عايز اقولك إن ربنا فرجها عليا من حيث لا احتسب يعني فجأة بدون مقدمات تلاقيهم في الشغل يقولك جهز نفسك عشان في سفرية هتتطلعها أو يكون لك فلوس عند حد وكنت تعتبرها ميته وفجأة الفلوس تجيلك أضعاف وهكذا وانت نفسك هتستعجب من الأبواب اللي اتفتحت لك ومكنش متخيل أن في من وراها رزق متشالك فحبيت اشارككم تجربتي يمكن يكون في حد مزنوق وميعرفش فأكون سبب في فك كربه.. اخيرا أدعوا الله وانتم موقونون بالإجابة يعني احنا مش بنجرب ربنا إن كان هيساعدنا ولا لا لكن احنا بندعي وأحنا واثقين في الله.
