ممكن تنزل مشكلتى من غير اسم
انا عندى 31 سنه اتجوزت صغيره وجبت ولد 12 سنه وبنت تلت سنين اطلقت من جوزى من سنتين وكنت بشتغل واعده انا وولادى فى شقه ايجار وكنت بصرف عليهم وكنت جايبه بنت تعد معاهم وانا فى الشغل
وانا كنت شغاله من حتى قبل ما اتجوز اتعرفت على شخص اكبر منى ب15 سنه كان اقرب صديق ليا ووقف معايا كتير اوى وحبنى جدا وبعد ما اتطلقت عرض عليا الجواز كنت برفض لانه متجوز بعد فتره حصلى ظروف كتير وهو كان معايا انا واهلى فى كل حاجه وطلب الجواز تانى وقالى اطلقها رفضت انه يطلقها وبعد كده هى وولاده اتعرفو عليا وقالو انهم موافقين على الجواز منى
اتجوزنا من حوالى تسع شهور وحقيقي هو احن واطيب قلب عليا وعلى ولادى وكويس جدا مع اهلى
هو كان بيروحلها يوم واحد فى الاسبوع وباقى الايام معايا وبنتجمع كلنا واهله كلهم بيحبوني
لكن زعل معاها واعد حوالى شهرين مبروحش
دلوقتى اهله وانا اتدخلنا فى الحوار واتصالحو علشان رمضان
اتمنى حل مشكلتي من خلال صفحتكم الموقرة ازواج لكن سعداء
هو قالى هرجع اروح اليوم الى بيروحه هناك بصراحه انا تعبت نفسيا من انى زوجه تانيه وبغير عليه اوى ومش متقبله انه يروح ويعد معاها حتى لو يوم
وهو بيقولى حرام لازم تاخد حقها وانا بقوله خليها على ذمتك بس متروحش وطبعا هو رافض
انا قلبى هيقف من الغيره انا عارفه انى قبلت من الاول وانى انا الى داخله عليها بس والله بحبه لدرجه بغير عليه من نفسى والنهاردة هو راح وحصل بينا مشكله كبيره بسبب كده وممكن توصل للطلاق وانا مش عارفه اعمل ايه من ناحيه مش هقدر ابعد عنه هو شايل عنى كل حاجه وبيحبنى وانا بموت فيه وحامينى وحامى ولادى وساندنى ومش هعرف اعيش ولا اتصرف من غيره
ومن ناحيه تانبه مش قادره ابقي انا هنا وهو بايت فى حضنها لدرجه انى ممكن اتجنن ولا اعمل حاجه فى نفسى والله عارفه انه غلط وكمان حرام بس هو ده احساسى
حد يقولى اعمل ايه انا بدعى ربنا يشيل الاحساس ده من جوايا مش قادره وحقيفى انا من غيره لوحدى تماما فى كل حاجه
ومن جوايا نفسى اقبل الوضع هو مفضلنى عليها فى حاجات كتير كفايه انه بيروح يوم واحد بس لكن اعمل ايه فى احساسى حد ينصحنى
