السلام عليكم ورحمة الله وبركاته
أنا متجوزة بقالي تلت اسابيع .. اخت جوزي متجوزة ومعاها طفل سنتين
المهم كل شوية تنطلي من تاني يوم الفرح وتلف في الشقة وقعدتها بتطول اوووي وانا حاطة انتيكات وتحف في الشقة ابنها بيبقى عايز يلعب ويكـ,ـسر ولما اقوم اشيل منه حاجة تتقمص وتقولي هو مش هيكـ,ـسرها ويقعد يشد المفرش واخر مرة شد مفرش السفرة كان هيكـ,ـسرلي فازة كريستال غالية لولا أني لحقته
وكذا مرة تغير لابنها البامبرز وترميه في المطبخ وبيخلي ريحة المطبخ تقـ,ـرف وبيخليني قرفانة من المطبخ نفسه
وهي كل شوية تدخل المطبخ بحجة أنها عايزة تشرب اخر مرة حـ,ـرجتها قلتلها خليكي مكانك ارتاحي وانا هقوم اجيبلك زعلت مني وقالتلي دا بيت اخويا يعني وانا مش واحدة غريبة ،،، مكنتش عارفة ارد عليها اقولها ايه انا مشكلتي اني بتحـ,ـرج ومش بعرف ارد
كل يوم تطلعلي وقت الغدا وتقولي أنا شامة ريحة اكل حلو من تحت ،، هاودتها مرتين ونزلتلها اكل من اللي بعمله زادت فيها وكل يوم تطلع وبقت تطلع وقت العشا وتقولي أنا شامة ريحة برجر لا شامة ريحة بطاطس لا معرفش ايه معدتش عبرتها
رغم أنها مبسوطة ماديا وتقدر تجيب كل حاجة
وهي جاتلنا مرة لقيتني طالعة من البلكونة لامة الهدوم في السبت لقيتها بتقولي وريني
كدا لبس جهازك اخد فكرة قلتلها عيب مينفعش وبضحك كدا
كذا مرة تقولي هو انتي قافلة باب اوضتك ليه
وانا ببقى قافلاه علشان أنا عارفة أنها بجحة وممكن تدخل تفتح حاجاتي وتقعد جوة لأن هي معندهاش مبدأ اسمه عيب أو خصوصية
لما يجيلي ضيوف الاقيها داخلة قاعدة معاهم ولما يمشوا تقعد تقولي والعة معاكي جايلك زيارات وفلوس
وقالتلي أنا لما ارجع الشغل كمان اسبوع هبقى اجيبلك ابني يقعد معاكي هزرت معاها وقلتلها لا ابنك مش بيقعد ساكت ومش بيسكت معايا وانتي هتجيبهولي من الصبح تقلقي منامي أنا في شهر العسل وقعدت اضحك معاها
أنا جوزي جاي اجازة شهرين معدش من إجازته غير أقل من شهر
والايام اللي هي قاعدة فيها في شقتها قارفانا مكالمات وكل شوية تتصل تقولي طابخة ايه خارجين فين بتعملوا ايه وووووو
جوزي كويس وبيحبني بس مش بيقول لأخته عيب أو مينفعش أو مش بيشوفها غلطانة
حد ينصحني ويقولي اعمل ايه لاني مبعرفش ارد في مواقف كتير وهي بتحرجني كتير أوي وانامش عايزة مشاكل أنا مش من النوع اللي احكي كل تفصيلة وأقول اختك عملت وسوت لاني بخاف يفهمني غلط أو يفكر اني مش بحبها وانا من النوع الكتوم شوية
