#جوازة_الندامة..
قــرد قطــع..
مسعود كان شاب في نص التلاتينات.. كل إخواته اللي أكبر وأصغر منه أتجوزوا من زمن وخلفوا.. وهو قاعد زي قرد قطع زي ما أمه بتقول عليه دايمًا.. وكانت هيتقلع لها عين وتشوفه عريس وتشيل عياله.. فكانت كل يوم والتاني تجيب له عروسة نقاوة عينها.. وهو أول ما يشوفها يقول مخنوووق مش عايز أتجوزها.
لحد ما ناس جيرانهم رشحوا له بنت قريبتهم.. قالوا له تعالى المغرب كأنك جاي بالصدفة.. وهي وأهلها موجودين.. وشوفها لو عجبتك اللي فيه الخير يقدمه ربنا.. وفعلًا راح.. وسلم وقعد وبيرفع بعينه كده ناحيتها.. قالك بسسس هي دي اللي هتجوزها.. يمكن ما كانتش جميلة بس ملامحها كلها طيبة ووشها منور.. وأهلها محترمين وشيك جدًا رغم إنهم من سكان الأرياف.. وفجأة مال على أبوها وقاله
“هي بنت حضرتك حد متكلم عليها يا حاج؟!.”
الراجل أتاخد من السؤال لأنهم فعلًا ما كانوش يعرفوا عنه حاجة.. فرمى بعينه ع بنته اللي لاقاها مبتسمة من سؤاله.. ففهم إنه فيه قبول فقاله..
– لا والله يا أبني لسه نصيبها ما جاش..
– طيب أنا يسعدني ويشرفني أتقدم لها!
– بس الحاجات دي لها أصول وإحنا لنا بيت نتكلم فيه
– ع راسي يا حاج طبعًا.. أديني ميعاد وأجي أنا وأهلي ع عنينا لحد عندكم نطلب أيد ست البنات.
فأخد رقم أبوها وقاله هيكلمه يحدد ميعاد.. وروح وهو طاير من الفرحة.. وقال يفرح أمه.. اللي دبت ع صدرها أول ما عرفت هي من طرف مين.
وفضلت تزعق معاه وتقوله يعني أجيبلك عرايس الدنيا وما تتجوزش غير عن طريق جوز أم ٤٤ جارتنا دي والله أبدًا.. يا ستي يهديك يرضيك مش أنتِ عايزة تفرحي بيا.. تقوله لا خليك قاعد زي قرد قطع كده.. يا ستي دول ناس طيبين تقوله لا فلاحين.. يا ستي دول شيك جدًا ومبسوطين ماديًا.. برضو لا..
وفضلوا يتخانقوا طول الليل لحد ما وافقت بالعافية تروح معاه هي وأخواته الرجالة الأتنين.. وأتصل وخد ميعاد من الراجل وكان ٥ العصر عشان سكة سفر رايح جاي وطريق طويل وكده.
أمه قالتله هات فلوس أشتري طقم أروح به.. وفلوس اتفق مع عربية تاخدنا وتجيبنا.. وفلوس أجهز الحاجة اللي هندخل بيها ع الناس.. وهو عيوني يا أمي اللي تؤمري به.. وفي الميعاد نازل ومتغندر.. لاقى أخواته الرجالة كل واحد فيهم شايل سباطة موز ونازل..
إييييييه ده يا أمي؟!.. الله بشرفك يا أبني الفلاحين يحبوا الفاكهة!!.. كانت بوادر شلل بدأت تظهر عليه وقال مش مهم يعدي اليوم ويشتري تورتاية فالطريق.. رايح يركب العربية.. لاقى ميكروباص محمل أخواته كلهم بجوازهم ومراتتهم وعيالهم!!.. هااااار أسود إيه ده يا أمي؟! أنا قايل لهم إننا ٤ أفراد مش ٢٠!!.. بس يا أبني ايش فهمك أنت لازم تدخل بعزوتك.. عاجبك ولا ننزل كلنا؟! يا ستي يلا أنا حاسس إن هتجيلي جلطة قبل ما نوصل أصلًا..
