في صيف 2003 و إنت بتقلب في التلفزيون و بتجيب قناة مزيكا إللي كانت لسه ظاهره ع الساحه في نفس الوقت كنت هتلاقي كليب اغنيه إسمها ” أه يا عيني يا ليل” لمطرب شاب إسمه لؤي و فجأه هتلاقي نفسك قاعد قدام الكليب و مستمتع بصوت الشاب ده إللي كان قادر بكل سلاسه يخطف قلوب الناس وقتها..
و يبدأ إسم لؤي يتكرر و ناس تسأل بعض سمعت لؤي ؟.. ده واد جديد صوته تحفه و من زمان مسمعناش صوت بالجمال ده و شويه شويه يتعرف لؤي و الناس تبدأ تسمع الالبوم كله.. عشان نكتشف اغنيه إسمها ” مين فينا ”
انا بدون مبالغه فاكر إني كنت بمشي في الشارع إسمع الاغنيه دي في كل حته و صوت لؤي و هو بيقول “بعد ما قولت خلاص ودعني و اهو حب و كان راجع تاني كأنه ما باعني ولا سابني زمان”
اغنيه لحد انهارده بسمعها بعد اكتر من 20 سنه..
و يعدي 2003 و تبقى السنه اللي بتقول للناس في نجم جاي يكسر الدنيا بجمال صوته و أدائه..
بس ده محصلش لؤي يختفي حوالي 3 سنين بس الالبوم بتاعه يفضل مكمل الفتره دي عشان في 2006 يظهر فيلم” واحد من الناس ” لكريم عبد العزيز إللي كان مكسر الدنيا وقتها و لسه عامل الباشا تلميذ و أبو علي.. بس إللي يلفت انتباه الناس وقتها هي اغنيه الفيلم اللي صدرت بصوت لؤي إللي بكل أريحية ممكن أقول إنها من أنجح التريندات إللي شوفتها في حياتي
صوت لؤئ و هو بيقول ” بس الايام مش سيبانا مش سيبانا في حالنا بتخدنا غدر على خوانه و يانا من إللي جرالنا”
لؤي قلب الدنيا بالاغنيه دي و كانت سبب رئيسي في نجاح الفيلم و نقول خلاص من هنا لؤي هينطلق بس بيختفي تاني و يظهر بعد سنتين بأغنيه فيلم رامز جلال أحلام الفتى الطايش.. إللي أنا حرفيا أول حاجه بتيجي في بالي لما بفتكر الفيلم هي اغنيه لؤئ و هو بيقول” أنا قولتهالك من اولها أنا أي حاجه ليك هعملها”
و كالعاده بيختفي لؤئ و يظهر بعد سنه كامله بأغنيه ” بلدنا في القلوب متشاله” من فيلم العالمي و الاغنيه هتكسر الدنيا و هتبقى مرتبطه باي حاجه ليها علاقه بمنتخب مصر لحد انهارده..
و بالضبط زي ما توقعت يختفي لؤي بعدها و يظهر تاني في مسلسل إسمه قصه حب بطولة بسمه و جمال سليمان التتر كان غناء لؤي بأغنيه ” ارجع يا زمن حن يا ماضي” اغنيه بتخطفنا عشان نتفاجئ إنها من ضمن البوم أغاني سنجل نزله لؤي اصلا..
لؤي الموهبه العظيمة دي معملش غير 3 ألبومات في حياته كلها
و لحد يومنا هذا يختفي لؤي سنتين تلاته و يرجع بأغنيه تقلب مصر..
لؤي بالنسبالي لغز.. موهبة استثنائيه من افضل أصوات جيله بلا شك إن لم يكن أفضلهم.. صوت بيجبرك تسمعه من جماله
انطلاقة لؤئ بدون مبالغه كانت أفضل من تامر حسني و حماقي و غيرهم… بس هو إللي ظلم نفسه و معرفش ليه ؟!!
لؤئ واحده من قصص المواهب إللي مكملتش و حرمتنا من احلى الأصوات في مصر آخر 25 سنه
و بقينا كل سنتين تلاته بس نفتكره مع إن الطبيعي إنه يكون حاليا من أكبر أسماء مصر في المجال الفني
