#مشكلة_عضوة
محتاجة رأيكم في مشكلتي…
أنا آنسة، دكتورة 35 سنة، اتخطبت لدكتور مطلق 42 سنة بدون أولاد. سألته عن سبب الطلاق، فقال إن طليقته كانت مهملة، ولما طلقها بعد سنة أخدت القايمة وكل حاجة، وخطب بعدها مرتين لكن محصلش نصيب لأن طلبات العرايس كانت كتير.
بسبب ظروفه المادية، اتفقنا إن السفرة والمطبخ وأوضة الأطفال في شقته (اللي كان شاريهم مستعملين) مش هيتغيروا، وإنه هيشتري لي أوضتين جديد، بس مش هيكتب قايمة غير بالأجهزة اللي أنا هجيبها. كمان اتفقنا على فرح صغير. لكن من بعد الدبلة، أهله بيلحّوا عليا دايمًا في موضوع كتب الكتاب.
هو كشخص بيصلي وبيقرأ قرآن، وبيهتم بيا وقت ما الأمور كويسة، بيجيب لي ورد وهدايا زي سلسلة فضة وأخرى دهب بعد الخطوبة. لكن لما بدأنا تجهيز الشقة، بدأت المشاكل تظهر:
حاول يقنعني إن الأوضتين اللي هيجيبهم يكونوا مستعملين، مع إنه معاه مبلغ كويس (150-170 ألف). ولما رفضت، كان بيختار الأرخص بغض النظر عن الجودة، بحجة إن العفش ممكن يتسر,ق أو يتبهدل مع الوقت. في الآخر، اخترت حاجات تناسب إمكانياته عشان أراعي ظروفه، واشتراهم. اشتريت التلاجة وبعتها على بيته بعد الاتفاق معاه، لكنه اتخانق معايا بحجة إن مامته اضطرت تستنى الراجل اللي جابها، فكم عليه إن لازم أرجعها أو أأجل اليوم لحد ما يكون متفرغ.
ودايمًا بيفهم كلامي غلط، يقلبه على إنه إها.نة، ولما أشرح له يقول إنه عنده مشكلة في الفهم. كمان بينتقدني في تصرفات هو نفسه بيعملها.و سألني أكتر من مرة “تفتكري هنكمل بعد الجواز قد إيه؟” وكان متردد قبل دفع فلوس العفش، لكنه في نفس الوقت بيضغط على كتب الكتاب ويزعل لما أقول إن عندنا بيتم يوم الفرح.
وكمان بيخاصمني بالأيام، ولو أنا اللي متصلة بيه يعتبر ده عادي.
ولما رفض إن سعر البوتاجاز يتكتب بالسعر اللي اشتريته بيه زمان بحجة إنه عنده واحد بيستخدمه، ولما صممت وافق بشرط إنه يفضل في بيت أهلي لحد بعد الجواز، وأنا اللي أتحمل مصاريف نقله وتركيبه.
ده غير اشترينا أنترية، لكن كرسي جه بلون مختلف، فطلبت نرجعه، وفعلاً تم تبديله بدون مصاريف، لكنه اعتبر إني مركزة في حاجات مش مهمة، وإنه مش فارق يعيش بأنترية ألوانه مش متناسقة.
وبيكدب وينكر اتفاقات حصلت بينا. بعد الخطوبة، قلتله نلغي الفرح ونكتفي بكتب الكتاب بسبب ظروفه، لكنه أنكر وقال إننا متفقناش على فرح أصلاً!
بعد كل ده، فسخ الخطوبة بحجة إننا مختلفين، وإنه شايف إن المستعمل زي الجديد، وإنه استغرب إننا طلبنا أوضة نوم وأنترية بعد ما أهلي قالوله في الأول “إحنا بنشتري راجل وملناش طلبات.”
بعدها، مامته كلمتني تحاول تهدي الأمور، وقالت لي “إحنا شارينك”، وهو نفسه كلمني عشان نرجع، فوافقت بشرط إن مدة الخطوبة تطول شوية عشان نشوف هيتغير ولا لا. لما جه يزورني بعد الرجوع، طلبت مامته تيجي معاه عشان تشهد إنه مش هيخاصمني تاني أو ينكر اتفاقات، لكنه زعل واعتبر إني “مصغراه” ورجع خاصمني!
السؤال:
هل هو عنده مشكلة نفسية، ولا مجرد تخوف من الجوازة الأولى لأنه خسر فيها فلوس كتير؟ ولو تزوجنا، هل ممكن يتغير للأحسن لما يطمن لي، ولا دي طبيعته وهيفضل كده؟
