انا من القاهره واتعرفت علي مدام مطلقه من القاهره بردو من خلال شغلي واتكلمنا فتره موبايل واتقابلنا كتير وعيشتني القصه ومن اول يوم قولتلها ظروفي وامكانياتي بمنتهي الصراحه وقولتلها يابنت الناس انا شقتي مفروشه وجاهزه وهخدك بشنطة هدومك ومش هكلفك جنيه وهنمشي علي شرع ربنا قالتلي انا معاك وموافقه . بعدها قالتلي لما نتجوز ينفع اسيب الشغل واقعد في البيت قولتلها معنديش ستات تشتغل اساسا. كانت مبسوطه جدا. وقعدت تقولي اهم حاجه يكون راجل محترم وجدع وحنين ويحافظ عليا وانا مش عايزه منه حاجه ومش مهم الفلوس والماديات ومعرفش ايه ولما دخلنا في الجد وقولتلها عايز اجي اتعرف علي اهلك لقيت لسانها اتعووج وطلعت اللي جواها والتمثيليه الفاشله خلصت والمعدن المصدي بان. وضاع شهرين من عمري في تمثيليه فاشله👇والحوار كان كدا بالحرف👇
هي : انا فكرت وغيرت رأيي ومش عايزه اسيب الشغل ولما تيجى البيت عشان تقابل اهلى مش عايزاك تختلف معاهم في مبلغ القايمة ولا الشبكة ومتقولش اني قولتلك عايزه اسيب الشغل.
أنا : قايمة ايه اللى بتقولى عليها مش احنا اتفقنا انا اللى هجهز البيت من كل شيء , والشبكة دى هدية منى ليكي ومحدش بيتشرط في هدية وانا ممكن مجبش شبكه اساسا زي ماقولتلك عشان ظروفي ووافقتي.
هي : أولا القايمة دى حقى عشان لو طلقتنى يعنى اخرج زى ما دخلت وثانيا الشبكة دى مهرى وحقى الشرعى !!
أنا : أولا القايمة دى حقك لو جبتى اى حاجة تتكتب فيها لكن من غير ما تجيبى حاجة يبقى ظلم وثانيا الشبكة لو اعتبرتيها مهر وحق شرعى فهى بتتحسب زى مهر المثل اختك او اى حد من قرايبك بيبقى جزء مقدم وجزء مؤخر والاتنين بيتكتبوا في قسيمة الزواج عشان لو حصل خلع تردى مقدم المهر وتتنازلى عن المؤخر ؟!؟ وبعدين غيرتي كلامك كله ليه ؟ حتي كلامك عن الشغل طلع فشنك.
هي : ايه الكلام الغريب اللى انت بتقوله ده وايه اللى جاب سيرة الخلع !!
أنا : وايه اللى جاب سيرة الطلاق ده شرع ربنا
هي : يعنى انت تستفيد من الجواز وعايز تتجوز واحدة تخدمك بدون حقوق ؟؟
أنا : انا مش جايبك تخدميني وانا كنت بخدم نفسي عادي وكمان انتى بتستفيدى من الجواز زى ما انا بستفيد منه بالضبط !!
هي : ازاى يعنى انت كده عايز خدامه بقا؟
أنا : شرع ربنا مفيهوش عيب احنا بس اللى بنحب نغير الشرع عشان يوافق رغباتنا .. انتى زى ما حسبتى الزوجة خدامه عند زوجها ماهو كمان بيشتغل ويوفرلها احتياجاتها ومتطلباتها المادية والجننسية ☺️
هي : يعنى لو طلقتنى هاخرج ايد ورا وايد قدام
أنا : هتخرجى واخدة مقدم المهر والمؤخر ونفقاتك زى ما الشرع حدد , طيب انتى لو خلعتى وانا كتبت قايمة يبقى ايه الحال
هي : انا مش بفكر في الخلع انا عايزه اعيش
أنا : واضح وانا مش بفكر في الطلاق انا عايز استقر وابنى اسرة وبيت والطلاق خساره الراجل.
هي : واضح ان الحوار معاك ملهوش فايدة انا عن نفسى مش ضامنة الرجالة
أنا : وعايزانى اضمنك انا ازاى و معندكيش ثقة في اللى هيتجوزك تتلككى على اى شيء وتروحى لبيت اهلك وترفعي خلع .. 😄
هي : مفيش واحدة هترضى تتجوز بالوضع ده
أنا : لو اى واحدة عايزة غير شرع ربنا متلزمنيش واللى بتدور على اللى يدفع اكتر تروح تعرض نفسها في سوق الجوارى احسن .
توته توته وانتهت التمثيليه على كده، نفسي افهم ليه بتعملوا حوارات؟ عشان كل همكم الفلوس بتخربوا بيوتكم بعد الزواج من اقل مشكله وتجروا عالمحكمه تعملوا خلع وضامنين ان معاكم قايمه هتطلعوا منها بمصلحه من شقا الراجل،، عايز اعرف رأيكم ايه يا ولاد الاصول ويا بنات الاصول !!!
