انا عندى ٣٥ سنة حاليا
وانا عندى ٢١ سنة اتجوزت جواز عن حب وطلع عندى مشكلة في الإنجاب ومفيش ليا اى حل طبعا الحب اتحول لجحيم ومرار في العيشة
طلبت منه يتجوز عشان يخلف وهو وافق ولكن كان عاوز يطفشنى الأول عيشنى في قهر وتعب وبهدلة وكان دايما بيعايرنى وانى حرمته من كلمة بابا والآخر طلقني عشان يتجوز ويخلف بعد ٧ سنين جواز
طبعا اتدمرت نفسيا واتعقدت وبقيت رافضة الجواز تانى نهائي طبعا كان بيتقدملى كتير عشان مبخلفش وكنت فرصة لأى راجل أرمل او مطلق ومعاه اولاد
وبعد طلاقي بسنة أتقدم واحد الكل ضغط عليا بكل الطرق انا كنت رفضاه تماما مرتحتلوش كنت بحس بخنقه وقلبي يتقبض لما يجيبه سيرته او اشوفه
هو كان أكبر منى بسنتين ومطلق ومعاه بنتين ٧ و٨ سنين أهلى سألو عليه محدش قال عليه كلمه وحشة وانه ابن ناس محترمين وناس طيبة جدا ده ال اتقال لينا وفي الاخر اضطريت أوافق وكان نفسي فعلا ابقي ام لبناته وقولت اعتبرها رسالة بقضيها في حياتى
اتجوزته وحبيت البنات جدا وهما كمان حبونى هو بقي مش قادرة احدد هل هو عنده اكتئاب ولو هو بيحب يعيش مع نفسه مكنش له وجود في حياتنا خالص وبعد ٦ شهور جالو سفرية السعودية وسافر وسابلى المسئولية كاملة حتى المصاريف كان بيطلع روحنا عشان يبعتها انا كان كل تركيزى البنات ومستواهم التعليمى وأخلاقهم وفرحتهم والحمدلله حياتهم اتقلبت للأحسن جدا بفضل الله وبحبنا وتفاهمنا سوا كانو دايما بيتكرموا اوائل في حفظ القرأن الكريم وهو ولا اى تقدير ولا اى وفاء حتى لعيالو قعد سنتين ونزل ايام كورونا وقعد ٦ شهور تانيين وقولت اصبر عشان خاطر البنات وانى اتعلقت بيهم اوى بالنسبالو هو كان غريب عنى وتعب نفسيتى وعلمني الكره خلانى فعلا اكرهه اوى بس كنت متمسكة وعايشة ومستحملة عشان المسئولية ورجع سافر السعودية وقعد ٣ سنين وحرفيا الرحلة دى كانت اسوء بكتير من ال قبلها
البنات كانت بتكبر ومسئولياتهم بتزيد وهو مكانش بيكلمنى غير في الشهر مرة وبخناق عشان مصاريفنا كان بيبعت ال٥٠٠ ريال شاملين كل حاجة واى ظرف هو ملهوش دعوة بيه لو جيت قولت بنت محتاجة علاج يقولى اجيب منين ولو جيت قولتله داخل علينا عيد زود شوية عشان اجبلهم لبس يقولى بلا عيد بلا زفت
كان بيوصلنى لانهيار فعلا وانى أحاسب نفسي هو ايه ال انا عملته في نفسي ده وايه الضغوط دى
وكمان البنات انا بقيت بالنسبالهم الاب والام وكل حاجة وصل سنهم ل ١٢ و١٣ سنة
انا تعبت وطلع عندى ورم الحمد الله حميد
بس قبل مااعرف انه حميد او اتطمن مكنش راضي يصرف على تعبي خالص كنت بتابع في مركز الأورام هو بعد عننا اكتر واتخلى عنى تماما حتى كنت بترجاه يبعتلى مواصلاتى بس للدكاترة كان بيرد عليا ويقولى اسرقلك وبعدين اكتشفت انه بيبعت فلوس لبنات وبيعمل حاجات كتير حرام
انا طلبت الطلاق بعد تمهيد واتفاق مع البنات وهما كانو مغلوبين على أمرهم وكانو في حيرة هما عاوزينى معاهم وكمان عاوزين راحتى وانى اتعالج
هو نزل بعد غيابه ال٣ سنين لقانى مصممة عالانفصال وبالفعل انفصلت في خلال شهر حتى اتنازلت عن حقوقي مقابل ان البنات تفضل تزورنى ونفضل على تواصل
انا منفصلة من ٣ شهور وقلبي واجعنى اوى مش عارفة اعيش من غير البنات ولا عارفة اعيش معاهم انا مبقتش عارفة اتعامل مع حد ولا حابة اختلط بحد مش حابة اخرج ولا عارفة اضحك حاسة انى زاهدة كل شئ
اكتر حاجة ألماني انى مش من حقى اخد البنات
احنا بنتكلم وبيبجوا يزورونى ومتبعاهم بس الحياة صعبة من غير ماكون معاهم كل لحظة ومستحيل ارجع لباباهم
كمان الكل كان بيلومنى انى اتخليت عن البنات والبنات صعبانه عالناس
مستحيل حد يحب البنات ويشيل همهم قدى مستحيل حد يحس احساسي ال انا حساه
البنات كمان باباهم سابهم لعيلتو وسافر وامهم مش عوزاهم يعيشو عندها
مش عارفة انا عليا ذنب فعلا هل انا كان مفروض اكمل في القهر والانهيار ال كنت عيشاه
انا مبقتش عارفة انا صح ولا غلط مبقتش عارفة انا عاوزة ايه الحاجة الوحيدة ال مستحيل تحصل انى ارجع للبنى ادم ده
