وصلت شقتي بعد يوم سفر طويل ..انا عايشه في القاهرة لوحدي بعد وفاة أهلي .. احنا اصلا من كفر الشيخ قرايبنا عايشين في قرية هناك ..فكنت بزور أهلي
جدتي اتحايلت عليا كتير اعيش معاها هي وجدو
ولازم اتابع الشغل في الأرض اللي ورثتها من ابويا
وأنه مينفعش افضل لوحدي في القاهرة
خصوصا واني لسه انسه ..قولتها متقلقيش عليا انا بنت ب ١٠٠ راجل وكمان عشان شغلي وحياتي كلها هناك فصعب
اسيبها وابدا من جديد في مكان تاني.
ولو ع الأرض فالبركه في جدو وعمو أيمن مش مقصرين
ودعتها ومشيت ..وعلى أمل اني ارجع ازورهم قريب
رجعت ومحستش بنفسي ونمت على طول من التعب
صحيت الصبح جهزت وفطرت ع السريع ونزلت الشغل
كان يوم طويل ومرهق..خصوصا وأنه كان في شغل متراكم عليا طول فترة اجازتي في البلد ..
في معاد البريك نزلت قعدت في كافتريا قصاد الشركه
وطلبت قهوتي وطلعت صورة من شنطتي
وبصيت لها وانا بعيط
كانت صورة اخويا علي اللي مات من 20 سنه
وكان عمره وقتها 7 سنين ..والنهارده عيد ميلاده
سرحت في الصوره وانا بفتكر ذكرياتي معاه
خصوصا اني اكبر منه بسنتين
اد ايه كان ولد لطيف ومحبوب من الكل
كنت بحبه اوي وبخاف عليه وحصلتلي صدمه
يوم وفاته ..كنا ايامها في البلد عند بيت جدو
وكنا بنلعب استغمايه ساعتها وغمضت عيني
وهو جري يستخبى بره البيت
اللي كان وسط الارض الزراعيه بتاعتنا
ولما فتحت عيني كان اختفى ..ومن ساعتها مشفتوش تاني
الا وهو جثة ..
القهوة يا انسه
فوقت من ذكرياتي على صوت الويتر
مسحت دموعي وشكرته
سألني حضرتك كويسه
ابتسمت بصعوبه وانا بقوله ..اه كويسه..مشي وكملت
أو بحاول اكون كدا
بعدها خلصت شغل ولفيت شوية بالعربية
اشتريت تورته وكام لعبه كان بيحبهم من محل ألعاب
ورجعت ع البيت
حطيت التورته وعليها الشمع وجنبها اللعب
ولسه هحتفل
سمعت صوت خبط خفيف على باب الشقه
كانت تقريبا الساعه ١٠ بالليل ..تجاهلت الصوت
ولكن بعد دقيقه رجع الصوت من تاني بس كان أقوى
استغربت جدا لاني غالبا محدش بيجيلي البيت
وخاصة في الوقت دا
روحت ناحية الباب وبصيت من العين السحريه
ملقتش حد ..استغربت اكتر وبدأت أتوتر
لسه هرجع مكاني ..الباب خبط من تاني
بصوت مهزوز مين ؟
..
الخبط هدي لكنه كان لسه مستمر
مين بيخبط ؟
…
أفتحي
الصوت كان ضعيف ولكنه كان مألوف
فتحت بسرعه واتصدمت لما لقيت طفل صغير
مديني ضهره واقف قدام الباب ولسه هيمشي كنت فتحت
ثواني وقف مكانه والتفت ببطء
وشهقت لما شوفته ..
دا كان علي ..أخويا !!
يتبع
#وعد
#حماده_هيكل
2
لما فتحت الباب ولقيته
علي .. اخويا
مكنتش عارف أتمالك نفسي من اللي شايفاه ..صدمه أو مفاجاه مش عارفه ..كل اللي اعرفه اني نزلت على ركبتي
وحضنته وفضلت ابكي
وقولتله..ياااه وحشتني اوي يا علي
وانتي كمان يا وعد
وحشتيني ..كبرتي وبقيتي اجمل عروسه
انا كل سنه في نفس المعاد بحتفل بعيد ميلادك
ابتسم وبعدها بص في عنيا وقال
انا عايزك تخلي بالك ؟
من ايه ؟
خلي بالك يا وعد
من ايه يا حبيبي ؟
منه ..هو مش ناويلك على خير
مش فاهمه ..
بعد عني وانا بحاول امسكه
بس زي ماتكون في حاجه مكتفاني
استني يا علي ..متمشيش انا مصدقت
علي ..يا علي
صرخت وانا بقوم من نومي وعرقانه جامد
وبتلفت حواليا ..يمكن ألاقيه..
خرجت من الاوضة وروحت المطبخ عشان اشرب
شربت ورانا راجعه..لمحت حركه غريبة ورا الستاره
كانت بتتحرك ..رغم أني قافله الشباك كويس
ومفيش هوا والجو حر
قربت من الستاره ..ولمحت حذاء تحتها
حذاء طفل صغير .. ايوه انا عارفاه
دا بتاع علي ..كان بيحبه اوي وهو صغير ..
قربت ببطء ..وانا بقول علي ؟
انت هنا يا حبيبي !!
مفيش رد
بلعت ريقي ودقات قلبي كانت بتزيد مع كل
خطوه وانا بقرب من الستاره
وشديتها مره واحده ولمحته واقف
وساعتها بص لي وقالي
لازم تلحقيها بسرعه
الحق مين ؟
تيته
تيته !!مالها ؟
ارجوكي مفيش وقت
قالها واختفى ..مسكت الستاره ورفعتها كان اختفى تماما وملوش أثر…
معرفش في ايه ؟
دخلت نمت بصعوبه وتاني يوم وانا في الشغل
كلامه عن تيته قلقني. فقررت اتصل اطمن عليها تليفونها كان مقفول
خلصت شغل واخدت عربيتي وطلعت بسرعه على بيت جدي في البلد..وصلت تقريبا بعد نص الليل
دخلت كان باب البيت مفتوح والدنيا ضلمه
تيته !! انتي فين
يا جدو انا وعد فينكم ؟
سمعت صوت صرخه مكتومه جاي من أوضة تيته
قلبي دق بسرعه وجريت على اوضتها
فتحت الباب ولقيت تيته نايمه وفي راجل جنبها
كان..
يتبع
#وعد
#حماده_هيكل
٣
..دخلت لقيت تيته نايمه وفي جنبها
راجل واقف لابس اسود ومخبي وشه ..مش باين غير عيونه
اول ما شافتني صرخت.
لكن صرخه مكتومه لانه كان حاطط شريط لاصق على بقها ..
وفجأة طلع مسدس وقالي بصوت تخين ومرعب لو قربتي هقتـ,ـلها
انت مين وعاوز ايه ؟
اششش اخرسي خالص
شوفت بعدها نظرت رعب في عيون تيته
وهو بيقلب في كل ركن في الاوضة وفتح الدولاب
وسرق الفلوس والدهب اللي في صندوق خشب بتاعها
وحطهم في شنطته وقال اي كلمه هخلص عليكم
قربت من جدتي عشان اطمنها …قالي خليكي بعيد
ارجعي مكانك ..
حاولت اطلع الموبايل ابعت رساله اول اكلم حد
لكنه لمحني ..جري عليا وخده مني خبطه ف الحيط كسره
وشدني من شعري ورماني ع الأرض
مسكته من أيده خربشته جامد ..صرخ بصوت مكتوم
وبعدها خبطني على دماغي بكعب المسدس
ومحستش بنفسي والدنيا لفت بيا
فقت بعدها لقيتني في المستشفى وجدو معايا
اللي كان باين عليه التعب والحزن
اول ما شافني فتحت
قام ببطء وفرحه قالي حمدالله على سلامتك يا غاليه
الله يسلمك يا جدو
اااه حطيت ايدي على دماغي مكان الضربه
وافتكرت اللي حصل
انا جيت هنا ازاي ؟و هي فين تيته ؟
ساعتها جدو انهار من البكا
ومردش عليا
لا متقولش ..تيته !! ارجوك رد عليا
خلاص يا بنتي متصعبيهاش عليا
فضلت اصرخ و اخبط في كل حاجه
دخل دكتور ومعاه ممرضه ..مسكتني
وادوني حقنه مهدئه لحد ما نمت
ايام العزاء كانت صعبه وتقيله
تيته حبيبتي مستحملتش اللي حصل
وجالها ازمه قلبيه وماتت اول ما الحرامي ضربني
وشافت الدم ..
وللاسف لحد الان محدش عرف يوصل للقاتل
ولا قدروا يوصلوا لاي خيط يفيد في القضيه
دخلت على جدو بعد ما الناس مشيت
قعدت جنبه وفضل يعيط
وقالي خلاص حبيبتي راحت وسابتني
واضح أنه مكتوب عليا أودع كل الغاليين
انا عاوز امـ,ـوت
بعد الشر عليك
دخل عمو أيمن وقال ..شد حيلك يا أبا
انت راجل مؤمن ..انا لله وانا اليه راجعون
قومي يا وعد هاتي العلاج لجدك
وحضريله لقمه يأكلها
انا مليش نفس لاي حاجه ..خلاص الدنيا ضلمت في وشي
مبقاش عندي حاجه اعيش عشانها
الحجه مكنتش أمي اللي خلفتني..بس هي اللي ربتني
وزرعت الحب في قلبي لاخويا وليها ولكل الناس
وعمرها ما فرقت ما بينا ..كانت ست طيبة وأصيله
ربنا يرحمها برحمته الواسعه
زاد بكاء جدي
وحد الله يا حج ..احنا كلنا جنبك اهو وانت راجل مؤمن
جبت صنية الاكل والعلاج وقام عمي
اخدهم مني وهو بيمسكهم ..كم الجلابيه
انشد لورا ولمحت اثر جرح على دراعه ..
عيني برقت وقلبي اتقبض وبعدها ..
يتبع ..
#وعد
#حماده_هيكل
4
اول ما عيني جت على أثر الجرح في ايد عمي..ارتبكت وحسيت نبضات قلبي زادت ..ساعتها ايدي اترعشت والصينية وقعت مني
انا اسفه..مش قصدي
ساعتها لقيته مسك ايدي وقرب مني
وقالي مالك يا وعد ..بتترعشي ليه
حسيت أنه عرف حاجه
ها..لا ما مممم مفيش
انا بس مرهقه وتعبانه ولسه الخبطة مأثره عليا
الف سلامه يا بنت الغالي ..خلاص روحي ارتاحي
في اوضتك وانا هعشي جدك وهديله العلاج
بس معلش اندهيلي ام حسين الشغاله من تحت تنضف المكان
خرجت بسرعه ودخلت اوضتي ..قفلت الباب
وانا قلبي بيدق جامد ..معقول ؟
عمو هو القا تل !! لا لا مش ممكن
دا كان بيحبها اوي والحزن باين عليه
ايوه بس ايه الجرح اللي في ايه دا ؟
تفسريه بايه ؟
كنت هتجنن من كتر التفكير
فضلت طول الليل قلقانه مش عارفه انام بسهوله
ومعرفش امتى وازاي نمت غصب عني !
تاني يوم دخلت عند جدو عشان اطمن عليه
صباح الخير يا جدو
صباح النور يا حبيبتي
صاحيه ليه بدري كدا ؟
انا اصلا نمت ساعتين وصحيت ..مش عارفه انام
ليه بس ؟
قلبي مقبوض
من ايه بس يا بنت اخويا
قالها عمي وهو داخل الصبح
باس ايد جدو وقالو
عامل ايه النهارده يابا
الحمدلله على كل حال
نازل الشغل ؟
ايوه معانا كام مشوار انا والرجالة ..وبعدها
هفوت ع الأرض ومصنع العلف في الغربية ..واحتمال
ابات بره النهارده ..
طيب يابني ترجع بالسلامه ربنا معاك
الله يسلمك
ها بقى مقولتيش مالك يا وعد
لا مفيش يا جدو ..بس الي حصل مكنش سهل
عندها حق يا حج ..روحي يا حبيبتي ارتاحي في اوضتك
ومتقلقيش من حاجه …كلنا هنا جنبك
اللي حصل ليلتها كان ..لأني كنت مسافر
وجدك اتاخر بره في واجب عزاء حد قريبنا
بس متخافيش من حاجه ..محدش هيقدر يقربلك
طول مانتي وسطنا …
وقرب مني وقال بنبرة بارده ..اطمني خالص
اليوم عدا عليا والليل دخل وبرضو
معرفتش انام ..كلامه كان بيرن في وداني
ونظراته ليا حسستني إنه مش ناوي على خير
نمت متأخر زي الليله اللي فاتت
وقبل الفجر حسيت بصوت حركة قدام باب اوضتي
فتحت عيني والدنيا كانت ضلمه كحل
في ايد اتمدت ع الاوكره وبتحاول تفتح الباب
ساعتها قلبي اتنفض وبقيت برجف
الباب اتفتح وفي حد دخل
وقفل الباب وراه بهدوء
خطواته بتقرب مني
عقلي بيفكر..اعمل ايه
اصرخ ولا اجري ولا استنى مكاني
بس هو ممكن يأذيني ؟
بس هو مين ؟
مفيش غيره ..اكيد عمي؟
فهم اني كشفته من الجرح وجاي يخلص عليا
ريقي نشف وخطواته بتقرب مني
وبعدها شفت ضل أيده بتقرب مني
صرخت و..
يتبع
#وعد
#حماده_هيكل
5
في ايد اتمدت ع الاوكره وبتحاول تفتح الباب
ساعتها قلبي اتنفض وبقيت برجف
الباب اتفتح وفي حد دخل
وقفل الباب وراه بهدوء
خطواته بتقرب مني
عقلي بيفكر..اعمل ايه
اصرخ ولا اجري ولا استنى مكاني
بس هو ممكن يأذيني ؟
بس هو مين ؟
مفيش غيره ..اكيد عمي؟
فهم اني كشفته من الجرح وجاي يخلص عليا
ريقي نشف وخطواته بتقرب مني
وبعدها شفت ضل أيده بتقرب مني
صرخت …وبعدها لقيت جدو
بيقولي بسم الله الرحمن الرحيم ..مالك يا بنتي بس
بلعت ريقي وولعت نور الاباجوره اللي جنبي
جدو!!
ايوه جدو ..اهدي واستعيذي بالله من الشيطان الرجيم
انا مش عارفه مالي ..
اهدي بس كدا ..واشربي المياه
ناولني كباية وشربت وقعد جنبي طبطب عليا
وقالي فيكي ايه بس يا بنت الغالي
انا كنت جاي اطمن عليكي
مش عارفه يا جدو ..مش عارفه مالي
ليه بس احكيلي
لسه هتكلم ..الفجر أذن
الله اكبر الله اكبر..طيب قومي اتوضي وصلي
وانا هنزل اصلي في الجامع ونكمل كلامنا بعدين
قمت صليت ودعيت ربنا يدلني وينور طريقي
لما رجع جدو قعدنا شوية وبعدها حضرت فطار و فطرت معاه وفضلنا نتكلم شويه
بس محبتش احكيله شكي في عمي لأن الموضوع مش سهل
وكون أن في خربشه في أيده دا مش دليل ..انا كدا ممكن اهدم الدنيا ..وفي نفس الوقت في تحقيقات شغاله ع الموضوع واكيد هيوصلوا للجاني
فات كام يوم وبعدها حصلت حاجه غريبة
لقيت رساله جاتلي ع الواتس
مكتوب فيها انا عرفت اللي قتـ,ـل جدتك
انصدمت لما شوفتها
سألته بسرعه
انت مين ؟
مش مهم انا مين
السؤال الأهم مين القا تل
بلعت ريقي وسكت شويه
وسألته
هو مين ؟
عاوز 200000 الف جنيه عشان أقولك
اتصلت ع رقمه كان مغلق
بالليل وانا قاعده وبفكر في اللي حصل
ومستنيه منه رساله او اتصال
لقيت صوت خبط على باب اوضتي
مين ؟
محدش رد
الخبط رجع من تاني
نزلت من سريري ومشيت بخطوات مهزوزه
وحطيت ايدي ع المفتاح وقربت ودني ع الباب
مين بيخبط ؟
مفيش رد
وبعدها لقيت جواب دخل من تحت عقب الباب
نزلت مسكته وفتحته …
انزلي تحت في الجنينه دلوقت حالا
كانت الساعه ٢ صباحا ..خوفت واترددت
رسالة واتس وبعدها جواب ..انا بقيت متلخبطه وخايفه
ومش عارفه اعمل ايه
مكنش قدامي غير اني البس الروب وانزل
ومشيت في جنينة البيت ..وفي صدى صوت ل علي بيقولي روحي ناحية البير المهجوره..
دي البير اللي لقينا جثة علي فيها بعد يومين من الاختفاء
لما كنا بنلعب استغمايه من ٢٠ سنه
حسيت بنبضات قلبي زادت والعرق ملى جبيني
وانا بتحسس الطريق ف الضلمه ..ناحية البير
خايفه ومرعوبه ..بس صوت علي مطمني شويه
وقفت عند البير ..وصوت علي اختفى
صوت نباح الكلاب والصراصير هو بس اللي بسمعه
دلوقت ..في احساس غريب اتملكني
سمعت زي صوت بينده عليا جايه من اعماق البير
بس بعيد اوي
يا وعد..
وعد
قربت اكتر من الصوت
وميلت جسمي عند حافة البير
عشان اسمع كويس
انا جدتك يا وعد
انصدمت وانا بقول تيته !!
لازم تجبيلي حقي يا وعد
من مين
لازم يا وعد
مين اللي عمل كدا يا تيته ؟
