انا عندي 30 سنه ومتـ,ـجوزه معايا ولدين وحياتي كلها قلبت فوق تحت عشان امي اللي عندها 55 سنه عاوزه تتجوز بعد العمر دا كله
انا ليا أخت اصغر مني عايشه معاها وأخ اكبر مني عايش في المانيا. والدي ميت من 16 سنه تقريبا وحياتنا كانت ماشيه تمام لحد من كام شهر لما امي قابلت بالصدفه زميل قديم كانت تعرفه قبل ما بابا يتقدملها زمان.
اللي فهمته انه كان زميلها فالكلية وجدي الله يرحمه رفضه لما اتقدملها فهو سافر برا مصر وكمل معظم حياته برا ومعاه جنسيه هولنديه. طبعا ابويا الله يرحمه اتقدم لماما بعدما زميلها اترفض بسنه واهلها وافقوا واتجوزته وخلفتنا وربتنا.
بعد اكتر من 30 سنه قابلته ماما بالصدفة في عياده الدكتور اللي بتراجع عنده عشان السكري. خد رقم ماما ورجعوا يتكلموا اتصالات وواتساب ولا اكنهم اتنين مراهقين لحد ما طلب ايدها. هو عنده بنتين عايشين في هولندا ومراته ماتت من 7 سنين
نيجي دلوقتى لاوحش حاجه فالقصه. موقف اختي واخويا كان صادم ومخزي. اخويا عايش في المانيا وماما قعدت تحكيلي بفرح انها لما قالتله سألها حاجه واحده بس (طب هو بيعاملك كويس؟). ماما ردت عليه (ايوه).
اخويا قالها انا معنديش اي مشكلة وربنا يوفقكم. كم الاحباط والغم اللي جاتلي من موافقته غير طبيعية. حسيت انه اتحول وبقى زي الاجانب اللي هو عايش وسطهم اللي معندهمش اي مشكلة امهم تتجوز مره واتنين وتلاته.
اختي بقى مخطـ,ـوبه وبتكمل ماستر ومش فارق معاها ماما
تتجوز مع ان جواز ماما فالسن دي ممكن يخلي شكلها وحش قدام خطيبها واهله بس هي بتقولي عادي خلي الناس تتكلم المهم ماما ترتاح عشان بابا كان بيضربها ويعاملها بطريقه مش كويسه لما كان عايش وهي واخويا عاوزينها تتبسط دلوقتى.
بس اللي انا شايفاه ان الاتنين عاوزين يرتاحوا من مسؤوليتها عشان اخويا بيصرف عليها واختي شايلاها يعني مش همهم سعادة ماما ولا حاجه بس عاوزين يخلصوا منها
وانا مش عارفه اعمل ايه وهيبقى موقفي ايه قدام جوزي واهله.
انا اصلا لسه يا دوب بس لمحت ان ماما ممكن تتجوز تاني قعد يتريق عليا اسبوع بحاله ولو امه واخواته عرفوا مش هيسيبوا الموضوع يعدي.
ويا ريت قبل ما تقولولي دا حقها تحطوا نفسكم في مكاني وكل واحد يتخيل امه تيجي بعد العمر دا كله عاوزه تتجوز متحكموش وخلاص.
وانا اصلا مش مرتاحه للراجل دا عشان عايز يغير حياتها يعني حتى مش هيسيبها تقعد في شقتها.
ارجوكم بدون تجريح فيه قولولى انا صح ولا غلط
