كان فيه زوجين في منتصف العمر عايشين حياة هادية ولطيفة ومتيسرة ماديا وتقريبا خالية من المشاكل , غالبا لأن الزوج _ وأنا أعرفه_ هادي إلى أبعد الحدود وصعب استفزازه , وبياخد كل الأمور ببساطة جدا
وماكنش فيه أطفال غير ولد واحد
الزوجة في فترة ما تعرفت على مجموعة صديقات , فواحدة منهن فضلت تنصحها إنها تشد على زوجها شوية وإنها مش مطالبة بخدمة زوجها , وإنه مادام عنده القدرة المادية العالية دي فمن حقها إنه يصرف أكتر ويخفف عنها
هو حقيقة الزوجة ماكنتش تعبانة أصلا وماكنش عليها العبيء الفظيع إللي يستدعي أي موقف منها , لكنها مع الكلام بدأت تاخد الأمور بحدة نوعا ما
بدأت بإنها مش عايزة تطبخ وعايزة واحدة تيجي تطبخلها , فالزوج رفض إن واحدة غريبة تدخل بيتهم لأنه لا يأمن لده , بس قالها
– يا ستي لو مش عايزة تطبخي ماتطبخيش , ونجيب أكل جاهز من المطاعم على طول
وفعلا بدأت تطلب الأكل بشكل دوري وارتاحت وهو قال مش مشكلة مادام الفلوس موجودة يعني وهو يقدر على ده
.
بعد فترة بدأت تتخانق معاه _ بإيحاء من صديقتها أو صديقاتها_ إنها محتاجة تخرج وتتفسح معاه , فبقى يخرجها أكتر من الأول
طلبت تخرج مع صديقات قدامى لها بشكل أكثر من الطبيعي , فوافق
حقيقة أنا من معرفتي بيه , إنها لو كانت طلبت منه أي حاجة _ مادامت حلال _ فهو مش هايرفض , لأنه زي ما قولت كل حاجة عنده بسيطة جدا
وكان مبدأه
” مادام الموضوع حلال وأنا أقدر عليه ماديا , فمش مشكلة ,,, ماهي لو مش هاتطلب مني أمال هاتطلب من مين يعني ”
المشكلة الوحيدة إنها كانت واخدة الأمر ” انتصار في حرب ” وهو كان معتبر طلباتها ” مراتي بتدلع عليا ”
.
الغلطة الوحيدة إللي حصلت إنها في مرة أخدتها الجلالة وهى بتحكي في جروب واتس مع صديقاتها قالت في فويس نوت
” ….. اصبروا شوية بس , قريب هاخليه يبوس جزمتي كمان كل يوم … ”
فواحدة منهن بعتت الفويس لده لزوجها عن طريق مجهول , وكانت النتيجة بعد ما استوعب الصدمة , جابها وسمعها الفويس وهى ماقدرتش تتكلم
فقالها بكل بساطة
” أنا هاقولك حاجة حلوة , الفترة الأخيرة كنت جايبلك دهب هدايا وقبلها كمان ,,, دول هدية مني يا ستي علشان أنا مش برجع في حاجة جبتها
ومؤخرك وقايمتك وكل حقوقك عمري ما هاجي عليكي فيهم
وانتي يا ستي طالق , وأنا كلمت أخوكي يجي ياخدك , فياريت لما أرجع ألاقيكي مش هنا , وكل حقوقك هانسقها مع أخوكي ”
بعد فترة وبالرغم من تدخلات أخوها إنه يصلح لكن للأسف كان قرار الزوج نهائي , لأنه بالرغم من إنه هادي جدا جدا والأمور بسيطة عنده , لكن مشكلته الوحيدة إنه لما بياخد قرار فيما يمس كرامته فبيبقى مستحيل تغييره
وبعد سنة تزوج
الأمر الأغرب بالنسبة لي , إنها بقت تكرهه جدا وبتعتبر إنه تخلى عنها علشان حاجة ما تستاهلش ده .
