نظرا لسوء الأحوال الجوية المتوقعة غدا
وزير التربية والتعليم يقرر اعتبار غد الأربعاء إجازة بكافة المدارس على مستوى الجمهورية
الثلاثاء ٢٩ أبريل ٢٠٢٥
أصدر السيد محمد عبد اللطيف وزير التربية والتعليم والتعليم الفني، قرارا باعتبار غد الأربعاء الموافق ٣٠ أبريل ٢٠٢٥ إجازة بكافة المدارس على مستوى الجمهورية، وذلك حرصا على سلامة أبنائنا الطلاب نظرا لسوء الأحوال الجوية المتوقعة غدا.
#وزارة_التربية_والتعليم_والتعليم_الفني
🔴 مصر بعد ساعات على موعد مع عاصفة ترابية ضخمة وخطيرة بتحذر منها كل وكالات الأرصاد تقريبًا..
القاهرة الكبرى ومعاها مدن من الدلتا وشمال الصعيد ومدن القناة وسيناء.. كل دول بكره هيمروا بأكبر منخفض جوي خماسيني نشوفه من سنين!
🔵 طب هو أيه الحكاية بالظبط؟!
⚫️ شوف يا سيدي.. من ساعات قليلة، بدأت مراكز الأرصاد الجوية في مصر والعالم العربي ترصد تكون منخفض خماسيني عميق جدًا فوق الصحراء الغربية، ومعاه رياح شديدة بتوصل سرعتها لـ 60 كيلومتر في الساعة.. والرياح دي حسب وكالة الأرصاد الجوية المصرية ممكن في بعض المناطق تتحول لما يعرف بإسم “الهبات العنيفة”، بسرعة ممكن توصل 90 كيلومتر في الساعة.. يعني قريبة من سرعة العواصف!
🟢 المشهد ده واللي متوقع حدوثه بكره، هيكون صعب على أي حد موجود في الشارع.. الهوا هيتحول فجأة لرياح شديدة، والرؤية هتقل جدًا وهتبقى مش شايف إيدك.. الشوارع هتغرق في ضباب ترابي والرملة هتزحف على المباني والمساكن..
المدن كلها من الدلتا لحد شمال الصعيد، مرورا بالقناة وخليج السويس وسيناء، هتعيش مشاهد غريبة بكره.. وممكن يحصل شلل مؤقت في حركة المرور بسبب الضباب والغبار، ومش بعيد بعض المطارات تأجل الرحلات أو تغلق المدارج مؤقتًا..
واللي بيخطط ينزل بكرة؟ خلي بالك عشان ممكن لو الوضع كان سيء، تلاقي نفسك مش شايف حاجة قدامك غير الغبار والرمال اللي مغرقين الدنيا!
🔴 الموضوع حسب خبراء الطقس متوقع انه يبقى شديد المرة دي عن كل مرة… ومفيش أي وسيلة نعرف بيها مدة العاصفة بالظبط، لأن حسب تصريحات هيئة الأرصاد الجوية، لسه مش ظاهر قدامهم الحجم الكامل للعاصفة على الخرائط.. يعني ممكن تخلص في ساعات.. وممكن تكمل ليوم كامل أو أكتر.. الله أعلم!
🟠 كمان الموضوع مش هيتوقف بس على الرمال.. لأ، متوقع كمان هطول أمطار متفرقة ورعدية على شمال مصر.. وطبعًا المطر مع الرياح الشديدة والرعد وكمان العاصفة الترابية هتكون خلطة صعبة ومثالية للفوضى، وممكن تبقى تهديد لأي حد سايق على الطريق ومش واخد باله..
🟢 طب إيه اللي نعمله عشان نحمي نفسنا؟
• حاول بقدر الإمكان متخرجش من البيت بكره إلا لو مضطر جدًا.
• لو لازم تخرج، خد معاك كمامة كويسة عشان تحمي نفسك من الأتربة اللي هتملى الهوا.
• لو قاعد في البيت، قفل كويس كل الشبابيك والأبواب.
• خلي معاك مياه وأكل خفيف للطوارئ في العربية أو البيت.
• وخلي بالك لو بتسوق.. وهدي السرعة على قد ما تقدر لإن الرؤية هتنخفض لأقل من مترين في وسط الجو العاصف ده، وأي سرعة زايدة هتهدد حياتك وحياة غيرك وتعرضها للخطر..
🔵 وحاجة مهمة كمان.. اللي عنده مشاكل تنفسية أو حساسية.. ضروري ياخد احتياطاته كويس جدًا.. ولو يقدر يريح في البيت بكره، ياريت ما يفكرش مرتين..
🔴 وعلى فكرة.. العاصفة دي مش أول مرة تحصل في مصر..
في عاصفة تانية مشابهة حصلت قبل كده سنة 1997، وبيعتبرها خبراء الطقس أقوى عاصفة ترابية في تاريخ البلد كلها، وسرعة الرياح فيها وصلت 112 كيلومتر في الساعة!
يومها حسب التعبيرات اللي استعملها تقرير قريته عن الموضوع في جريدة الوطن، الدنيا اسودت حرفيًا.. النهار فجأة بقى مضلم ونوره خافت، ومن هيبة المشهد الناس البسطاء افتكروا إن القيامة هتقوم، لدرجة إن حسب كلام الناس اللي مرت بيها، الظالم فكر ف اللي بيعمله، واللي كان ناسي ربنا سجدله يطلب المغفرة.. عشان الانسان في غالب طبعة مبيفتكرش ربنا الا لما بيشوف آياته. وأكيد هتلاقي ناس بتحكي عن الموضوع تحت في الكومنتات 👇
وبكره المشهد غالبًا هيبقى شبيه باللي حصل ساعتها.
🔴🔵 الصورة اللي مع البوست دي هي صورة نادرة متاخدة من تغطية التلفيزيون المصري لعاصفة 1997 بالمناسبة.. وهتلاقي فيديو للعاصفة من التلفيزيون المصري في أول كومنت 👇
🟠 وفي ظل الأحداث الغريبة اللي بنعيشها في بلدنا وأوطاننا الفترة الحالية، والكوارث اللي عمال يمر بيها العالم بقاله فترة، وحتى الجرايم الغريبة اللي بقينا نشوفها في مجتمعنا بشكل غير مسبوق الفترة دي ما بين تحرش بأطفال وجرايم ق.تل وسفا.حين وبلاوي سودا، فكل اللي بيحصل ده لازم تعتبره رسالة من ربنا..
🔴 الظواهر الجوية المتطرفة دي رسايل من الله سبحانه وتعالى عشان تفكرك ان الإنسان مهما افتكر نفسه قوي ومالوش كبير.. فهو بردو قدام قوة الله سبحانه وتعالى والطبيعة اللي خلقها بيبقى ولا حاجة.. وممكن في لحظة واحدة كل اللي انت بتجري عليه يضيع أو ينتهي.. والدنيا دي كلها لا تسوي عند ربك مقدار جناح بعوضة!
🟣 خليك فاكر.. كل نفس جديد بتاخده نعمة، وكل لحظة أمان بتعيشها مش مضمونة ومش دايمة للأبد.. ف قول سبحان الله واستغفره.
استعد، وخليك واعي، وحافظ على نفسك وعلى أهلك.. ومتنساش تعمل شير للبوست عشان يوصل للناس، والكل ياخد حذره واحتياطاته.. وبإذن الله يعدي على خير.
هتلاقي في تاني كومنت صورة من البيان الرسمي لهيئة الأرصاد الجوية 👇
#علام
