– أنا سامع إن إبنك “عبد الرحمن” الزعيم هو إللي سماه
= عبد الرحمن لما جينا كبرنا قالي إيه أستاذ عادل كنت شغال معاه في الزعيم
– كنتوا بتعملوا الزعيم ساعتها؟
= اه ، قالي يا سليمان بقى إيه .. هو يعني المسرحية جت .. المسرحية دي جت بشكل غريب جداً
أنا كنت في شهر العسل ونازل منه ورايح مسرحية إسمها جوز ولوز .. لقيت المسرحية قفلت .. وأنا عليا إقساط في الشقة وراجع من شهر العسل وراجع عامل حسابي هقبض وكده … فجأة يا معلم المسرحية وقفت وناس بتخبط عليا عايزين مني فلوس !!
أنا ابويا علمنى حاجة … ما استلفش من أي حد جنيه، فقولت هشتغل حتى لو في “المجاميع” لحد ما اسدد اللي عليا
.. كلمت “فتوح أحمد” كان بيصور مسلسل في ناهية قولتله عايز اشتغل أي حاجة .. قالي مجاميع ايه ده أنت خريج معهد !! قولتله بص أنا اجري 75 جنيه في الحلقة لما هعمل 10 شوتات هاخد 750 جنيه وده رقم كبير وقتها هسدد كل أقساطي.
لما روحت هناك اتكسفت لأني لقيت زمايلي أبطال المسلسل كانوا تلامذة أصغر منى في المعهد وشافوني بعمل بطولات في المعهد قبل كده، قالولي أستاذ سليمان ايه اللي جابك .. اتكسفت وقولتلهم سمعت أن فيه تصوير فـ جاي ازوركم، المخرج قالي ايه مش هتشتغل؟ .. قولتله لا أنا مكسوف !!
حد اقترح انهم يكتبوا اسمي من غير ما اصور بس أنا قولت لا أنا هستحرم الفلوس دي، قالي عايز ايه قولتله حطولي جلابية وطاقية ومش هروح البروفة هروح التصوير على طول اقف ورا وأنا لابس الجلابية محدش هيشوفني، وخدت الفلوس.
وأنا مروح مع محمود البزاوي قالي ما تيجي معايا تتفرج على البروفة الجنرال بتاعة الزعيم، قولتله طب ما تشغلوني معاكم !! قالي بقولك جنرال هنفتح بكرة، قولتله خلاص، روحت لقيت العرض اتأجل أسبوع ولقيت حاجات مش كاملة في الإضاءة … قولتلهم طب أسلم على أستاذ عادل امام.
كنت عملت معاه “الإرهـ*ـاب والكباب” وكان مع أستاذ شريف مخرج المسرحية برضه، وحكيت لأستاذ عادل القصة اللي حكيتها دي وقولتله ممكن أشتغل مع حضرتك !!
نادى على أستاذ شريف وقاله فيه حاجة عندنا لسليمان أنا عايزه معايا، فقاله مفيش غير دور للملقن راجل عجوز بيطلع كل شوية من الشباك يقول “انتي بتعملي ايه عندك يا أم سيد؟!” قالي تعمل راجل عجوز !!! قولتله أنا أصلاً عجوز يا أستاذ حتى بص حضرتك وقعدت أمثل راجل عجوز قدامه، ضحك وحضنني وقال هاتوله عقد .. وسألني بتاخد كام؟!
في جوز ولوز كنت باخد 400 جنيه وكانوا واعدينني أخد 600 جنيه في الموسم التاني، فقولتله 600 جنيه، لقيته بيبرق ويقولي 600 جنيه !!! قولتله والله يا أستاذ كانوا 400 وهيبقوا 600 .. فقالهم طب اعملوله عقد بـ 1500 ج !! 1500 جنيه مع أستاذ عادل اللي بيعرض 10 شهور في السنة وأي مسرحية جنبه بتشتغل شهرين وتلاتة بس.
ابني بقى لما اتولد أستاذ عادل عملي حفلة في العرض وجابوا أغاني وحاجات السبوع وجبنا دمية طفل كده عشان ماجبتش ابني طبعاً وعملت سبوع عبد الرحمن في المسرح وروحت يومها معايا هدايا كتير … سبحان الله الرزق بيدور على صاحبه.
الطيب أبو قلب أبيض الراحل سليمان عيد 🤍
