رديت بالهم والهم مش راضي بيه

رديت بالهم والهم مش راضي بيه ،معلش دخلت عليكم بالدخله دي لانها انسب تعليق على مشكلتياسمحولي اعرض مشكلتي هنا على صفحتكم ازواج لكن سعداء يمكن الاقي حل ليها
انا اتجوزت تلات مرات عارفه انه صعب على الست انها تتجوز اكتر من مره وكتير حيشوف كلامي على اني ست جريئة بس والله كل جوازة من دول كان ليها هدف ولما بتفشل بنطلق بكل ادب الا اخر جوازة قولت راجل ومحترم وكلامه قليل ومرتاح ماديا وفعلا الجوازة طولت وعمرة لدرجه اني خلفت بنت وولد وقبل كده مكنتش خلفت اول جوازة طلع مش بيخلف وتاني جوازة مكنش عايزني اخلف

وعشان كده اتطلقت للمرة التانيه لغايه ما ربنا جمعني بجوزي التالت وقولت العيشه حتحلو هو طبعا سبق ليه الجواز بس زوجته توفت ربنا يرحمها ونجدها منه ههههههه ولا يمكن ماتت مقهورة وبحسرتها مشكلتي ان جوزي الاخير بيعشق الكأبه عشق اه والله ذي ما بقولكم كده يمكن ضحك مرتين في حياته يوم ما خلفت ويوم ما اشترى عربيه
غير كده بيحب الحزن حتى ملامح وشه مكشره وانا بقى بحب الفرفشه عكسه خالص
قولت يابت عيشي وخلي ضحكك مع عيالي واخواتك وحلو كده
سيبيه هو بحزنه لكن اخر عركه بينا وصلتني لمرحله صعبه وخايفه من مثل من عاشر القوم سار منهم وابقى ذيه ابن الكئيبة ههههههه ،المهم انا كنت عمله جمعيه وقولت حجدد بيها اوضه الاولاد وافصل البنت عن الواد كل واحد يبقى ليه اوضة مستقله

فصلت الاوضه وعملت لكل واحد سرير ودولاب ومكتب حجمهم صغير بس مناسبين للاولاد عملتهم عموله وجيت فرشت الاوضه وتمام التمام وفرحتهم هم وكان اصحابهم معانا وجه ابوهم من الشغل الطبيعي في المواقف اللي ذي دي يدخل يقول ايه مبروك ده اقل حاجه صح

لا لاقيته اول ما دخل قعد يزعق ويقول لاااااااااا لااااااااااا قولتله ايه حصل ايه قالي وديتيها  فين …….

صورة اخويا المرحوم اللي كانت متعلقه في الاوضه قولتله شلتها مفيش مكان ليها قالي يعني ايه انا اخويا متتشلش صورته قولتله هو الله يرحمه والذكرى مش بالصورة لاقيته قدام صحاب ابني قام ماسكني من ايدي وعايز يخرجني من شقتي ويقولي ذي ما خرجتي صورة اخويا من مكانه حخرجك انتي كمان

وقعد يجرجر فيه ولا الخدامه عنده انا قعدت اصوت واعيط منه لله ضيع فرحتي وفرحه عياله بالاوضه وفضلت اتحايل عليه اقوله حطها طب في اوضتك قالي لا طبعا مينفعش احط صورة اخويا في اوضه نومي وانتي فيها ،انت في ايه ولا في ايه حيغير عليه وفي نفس الوقت بيطردني من بيتي

انا دلوقتي روحت بيت اهلي وهو مصمم ارجع الصورة مكانها وهي فعلا ملهاش مكان في الشقه فانا قدامي حل اروح اعمل برواز صغير واحطها على اي طرابيزة ولااسيبه يضرب دماغه في الحيط وذي ما مشاني يرجعني وفكني منه ومن تصرفاته المجنونه ولا اعمل ايه يا استاذه غاده وخصوصا ان صعبان عليه عيالي ودول اللي طلعت بيهم من الدنيا بعد كل الفشل في جوزاتي دي ارجوكي انشري مشكلتي على صفحتك ازواج لكن سعداء عشان اعرف رأي الناس فيها وشكرا لحضرتك واسفه على الاطاله