السلام عليكم ورحمة الله
، أنا الحمد لله طبيب ناجح و معروف ، متزوج من انسانة فاضلة جدا و متدينة جدا و خلوقة جدا ، بحبها جدا ، ساعدتني و دعمتني و وقفت جنبي من اول يوم في زواجنا ، عندنا توأم بنت و ولد عندهم 3 سنين ، بعد زواجنا ب 7 سنين ، عرفت من احد معارفي أن فيه انسانة مطلقة بدون محاكم و هي متدينة و خلوقة و اتظلمت في زواجها السابق ، أنا فعلا كان عندي نية التعدد بس كنت منتظر الإنسانة المناسبة في الوقت المناسب خصوصا ان شروط التعدد متوفرة فيا ، و فعلا تقدمت لها و حصل بينا قبول نفسي و عقلي ولكن انا اشترطت ان زوجتي متعرفش غير مني و في الوقت المناسب ، تزوجنا و وجدتها امرأة صالحة خلوقة و ست بيت فعلا كما قالوا عنها ، بعد سنة من زواجنا قررت اني لازم اقول لزوجتي عشان مظلمش زوجتي الثانية اللي هي قدرت موقفي و ساعدتني فعلا ، جيت في ليلة مع زوجتي الاولي قولتلها هو انا قصرت في حق من حقوقك من اول زواجنا ؟! = قالت لا بالعكس انت ما شاء الله مش منقصني اي حاجة و دعت ليا
قولتلها طب انا قللت في حبي ليكي أو مشغول عنك أو أهملتك ؟! = استغربت مني و قالت ليه الأسئلة دي هو فيه حاجة ، أنا متأكدة من حبك ليا ،
قولتلها طيب احنا في حياتنا من البداية قبل ما بنقرر قرار معين بنعمل ايه ؟!
قالت بنشوف حكم الشرع فيه لو حلال بنعمله و لو حرام مش بنعمله الحمد لله
و بعدين قولتلها على اللي عملته كما كان ، مكنتش عارفة تقول ايه و اتعصبت و بكت و حاولت اهديها بس معرفتش و تاني يوم اخدت الولاد و راحت لأهلها حتي مخلتنيش أوصلها بعربيتي و كسرت كلامي ،
بقالها كدا 3 شهور مصممة علي الطلاق بدعوي أن معندهاش مقدرة تكمل و اني ظلمتها و خونتها و خونت حبها و حبي ليها مش حقيقي و انا ما زلت بحبها و باقي عليها و عمري ما هتخلي عنها ابدا بس هي مش فاهمة كدا ، طول الشهرين دول رحت عندهم كتير و والدتها تعاتبني بطريقة كأني عملت جريمة و والدها متفهم الأمر و قالي دا حقك ي دكتور بس هي تعبانة نفسيا و هي اللي هتقرره انا هبقى معاها فيه ، أنا عمري ما هتخلي عنها ابدا بس انا هسيبها براحتها لحد ما تاخد قرارها الأخير و ايا ما كان هو هعمله ، أنا مش بقول كدا عشان أبين نفسي اني زوج مثالي ولا الكلام دا ، أنا الي الان مذهول من اللي عملته ، دا حياتنا ماشية بشرع الله ، هي دوما تذكرني قبل ما اعمل اي شيء بالحكم الشرعي ، تقوم تعمل كل دا ، عشان ايه ، لو انا فعلا حسيت من نفسي التقصير ناحيتها عمري ما كنت اتجوز تاني ، أنا مش عارف اعمل ايه عشان تقتنع اني بحبها و باقي عليها ، أنا مستحيل اطلق زوجتي الثانية مستحيل
