أوروبا بقالها كام ساعة بتمر بكار.ثة… أكبر انهيا.ر شامل للشبكة الكهربائية ومحطات الطاقة في تاريخهم الحديث… و50 مليون أوروبي حاليًا بدون كهرباء!
ودلوقتي شبه الجزيرة الأيبيرية كلها — يعني إسبانيا والبرتغال — ومعاهم أجزاء من فرنسا، رجع فج.أة للقرون الوسطى بدون نور ولا كهربا ولا تكنولوجيا ولا حضارة!
شبكات المترو وقفت، المطارات اتقفلت، الإنترنت واقع ومفيش تغطية شبكة محمول… حتى البرلمان الإسباني نفسه اتقطع عنه الكهربا، والناس ماشية تخبط في بعض في الشوارع، ومحدش حتى عارف يسحب فلوس يجيب أكل!
طب هو أيه اللي بيحصل بالظبط؟!
تعالى نرجع بالزمن لورا كام ساعة عشان نفهم الحكاية من الأول..
شوف يا سيدي.. اللي حصل بالظبط ان من ساعات فاتت، وفي أوقات مش محددة بالظبط، وفج.أة وبدون أي مقدمات الكهربا وقعت في معظم مدن إسبانيا والبرتغال، ومنهم عواصم كبيرة زي مدريد ولشبونة!
تخيل معايا المشهد: عربيات ماشية في الشوارع من غير إشارات مرور.. مطارات مليانة مسافرين مش عارفين يطلعوا أو ينزلوا.. مترو الأنفاق كله متوقف.. والناس في الشوارع ماسكة موبايلاتها فوق .دماغها بتحاول تلقط أي شبكة بدون نتيجة، ومحدش حتى عارف يتواصل مع أهله أو صحابه!
تخيل مطاعم ومكاتب ومحلات سوبرماركت شغالة بأضواء الكشافات، وناس محبوسة في الأسانسيرات مش عارفة تخرج! وحتى مطار لشبونة أعلن إنه بيشتغل على مولدات احتياطية، ومطار مدريد حصلت فيه تأخيرات ضخمة في كل الرحلات!
الموضوع مكنش محصور بس في إسبانيا والبرتغال.. لا، حتى جنوب غرب فرنسا اتأثر، بس رجعوا الكهربا هناك بسرعة.. وطبعًا دلوقتي مع الانقطاع اللي غطى الشوارع، ناس كتير هجمت على محلات المياه والأكل، ومكن الـ ATM بتاع البنوك بقى عليه طوابير طويلة عشان الكل عايز يسحب كاش بعد ما كروت الفيزا مبقتش شغالة!
الحكومة الإسبانية قالت في بيان رسمي إن “أسوأ انقطاع كهربا في تاريخنا الحديث حصل النهاردة”.. وإنهم مش هيهدوا غير لما يعرفوا السبب الحقيقي..وبالفعل الحكومتين الإسبانية والبرتغالية اتخذوا إجراءات طوارئ بشكل فوري، وعملوا اجتماعات أزمة على أعلى مستوى. ومع ذلك، وبعد مرور ساعات طويلة ولحد اللحظة اللي انت بتقرأ فيها السطور دي، محدش عارف أيه اللي بيحصل، ولا حد قادر يقول إيه السبب الحقيقي!
المخيف بقى، هو ان في تسريبات ابتدت تطلع دلوقتي وبتقول ان الموضوع يكون هجو.م إلكتروني أو Cyberattack ضخم، ويمكن يكون الأضخم في تاريخ العالم كله، عشان يقدر يوقع أنظمة دولتين من أكبر دول أوروبا!
وفوق كل ده، في تصريح خط.ير جدًا ظهر في الصحافة من دقايق فاتت.. وزير في الحكومة البرتغالية لمح بالكلام وقال: “يبدو إن المشك.لة قادمة من شبكة التوزيع… واحتمال من خارج حدودنا!”
يعني مش مستبعدين يكون فيه طرف خارجي أو دولة تانية ورا اللي حصل!
ف تخيل انت لما حاجة زي دي تحصل، في بعض من أكبر وأهم دول العالم الأول، اللي عندهم أكتر أنظمة حديثة ومتقدمة على الكوكب..
تخيل… لما في أقل من ساعة، مدن عالمية متحضرة زي مدريد ولشبونة، رجعت فج.أة لعصور الظلام.. ولا نت، ولا كهربا، ولا نقل، ولا أمن إلكتروني.. وفي لحظة واحدة، العالم اللي معتمد كليًا على التكنولوجيا الحديثة والإلكترونيات وشبكات الطاقة، بان قد إيه هو هش وضعيف وممكن يتم إسقا.طه بعطل واحد بس!
هل حضارتنا الحديثة مبنية على خيوط عنكبوت ممكن تنها.ر في لحظة؟
الله أعلم.. بس اللي حاصل في أوروبا دلوقتي ده مؤشر خطير جدًا.. وكل العالم دلوقتي بيتابع الموضوع ومنتظر التفسير.. هل هو فعلًا عطل عادي، ولا في هجو.م إلكتروني ضخم وغير مسبوق ورا اللي حصل؟
أدينا متابعين مع بعض، وهقولك كل التحديثات الجديدة اللي هتحصل في القصة دي أول ما تتوفر.. ولحد ما تظهر معلومات جديدة، متنساش تعمل شير للموضوع وتوصله للناس عشان غيرك يعرف باللي بيحصل حواليه في العالم…
#علام
