#مشكله
انا هتكلم وانتو شوفوا مين الغلطان ..
انا متجوزه ومعنديش اولاد جوزي في بينه وبين والدتي شويه خلافات ف مبيجيش عندها ولا هي بتروح عندي
اول امبارح جيت عند والدتي لأن عمتي كانت عزمانا عندها قبل رمضان المهم انا ساكنه ف مكان بيني وبين والدتي ساعتين ف جيت علي مكان والدتي خدتها وروحنا علي عمتي بينها وبين والدتي ساعتين بردو روحنا قعدنا وخدنا وقتنا وروحنا وصلنا بيت والدتي الساعه ٦ المهم استأذنت جوزي اني هبات واجي تاني يوم لاني تعبت م المشوار ولسه هروح زياره لخالتي عشان مريضه قالي تمام بس انا مبعرفش اصحي للشغل انتي اللي بتصحيني قولتله خلاص هجيلك الصبح بدري اصحيك قالي ماشي
المهم رنيت عليه ع التليفون الصبح قولت لو رد وصحي خلاص هنام شويه واصحي اروح لو مصحاش هروحله اصحيه.. رنيت عليه صحي من اول رنه وفضلت معاه لحد ما قام ولبس عشان اضمن أنه صحي
قالي انتي هتنزلي من عندك امتي قولتله شويه بس لاني نمت الساعه تلاته ونص اليوم اللي قبله وكنت تعبانه م المشاوير قالي طيب وقفلنا
لقيته الساعه ١١ ونص الضهر بيرن عليا يجي ٥ مرات ورا بعض كنت وقتها بجيب شويه طلبات لوالدتي قبل ما امشي وشايله حاجات ف ايدي الاتنين رديت بصعوبه قالي انتي لسه مركبتيش قولتله هجيب بس شويه طلبات وافطر مع ماما وانزل يقولي لا انتي قيلالي هنزل م البيت الساعه ٧ قولتله ماشي ما دا ع أساس اجي اصحيك لكن انت صحيت خلاص وانت ف شغلك بترجع الساعه ٨ ونص بليل ف هكون قاعده لوحدي انا هفطر واجي يقولي لا تركبي دلوقت وراح قافل الخط
طلعت فطرت بسرعه ونزلت وبكلمه بقوله اني طالعه اركب يقولي هي الساعه كام
انتي متفقه معايا ع ايه
هو دا اللي هتنزلي الساعه ٧ اعيد واكرر نفس الكلام بردو مفيش فايده
لدرجه قولتله افترض اني كنت متفقه معاك ع كدا فعلا ومن تعبي نمت واتاخرت شويه محصلش حاجه يعني وانا خلاص جايه اهو يقولي لا مليش دعوه انتي متفقه معايا وانا غلطان اني خليتك تروحي اصلا ولما تيجي نشوف الموضوع دا عشان مش هعديه
قولتله انت كمان خليته موضوع طب انا ارجع تاني عند ماما يعني قالي براحتك
جيت رجعت فعلا اتصل بعدها بشويه قالي جايه ولا لا بطريقه وحشه قولتله انت قولتلي براحتك يعني مش فارقه معاك قالي طب اعملي اللي انتي عاوزاه وقفل
اتصل بيا الساعه ١٠ بليل يقولي اركبي وتعالي قولتله الساعه عشره خلينا الصبح الوقت اتاخر جدا يقولي لا دلوقت قولتله صعب قالي كلمي اهلك نطلق
